Кодшо ийын шыжым «Это у нас семейное» всероссийский еш конкурс тӱҥалын.
Тудын организаторжо – «Россий – йӧнан эл» президент платформо.
Конкурсышто таҥасаш йодмашым нылыт деч шагал огыл еҥан, кум тукымым ушышо еш пуэн кертын.
Октябрь гыч тений февраль марте дистанционный этап лийын. Тудын дене келшышын 40 заданийым шукташ кӱлын. Еш команде-влаклан йолташышт-шамычлан «званый ужин» манмым, пошкудо-шамыч дене «Весела стартым» эртараш, поро пашам ышташ, икымше полышым пуаш, мультфильм гыч сценым сниматлаш, пачерым да подъездым сӧрастараш, Сергей Жуковын рецептше почеш когыльым кӱэшташ, иктаж-могай шке механизмым, тыгак еш гимным, гербым шонен лукташ да ятыр моло заданийым шукташ кӱлын.
Тиде этапын иктешлымашыж почеш, а тушко Юл кундем федеральный округ гыч 21 тӱжем утла еш ушнен, эн сай команде-влакым округысо 7 полуфинал кокла гыч иктышкыже ӱжыныт.
ПФО-со еш-влакын полуфиналышт 30 май гыч 2 июнь марте Уфаште эртен. Марий Эл деч тушко 12 еш миен. Участник-шамычлан уш-акыл пӱсылыкым ончыктымо, спорт да усталык заданий-влакым шукташ кӱлын. Нунын иктешлымашышт почеш 368 гыч 78 ешлан финалыш путёвкым кучыктеныт. Тудо 5 — 8 июльышто Москваште лиеш. Сеҥыше-влакым 8 июльышто Еш, йӧратымаш да ӱшанле улмо кечын увертарат. Тиде радамыш логалше 30 ешлан илыме верыштым саемдаш 5 миллион теҥгеаш сертификатым кучыктат, а 300 еш путешествийыш кая.
Марий Эл гыч полуфиналыште кум еш сеҥышыш лектын. Тиде – Йошкар-Ола гыч Волковмыт, Шаблий; Оршанке район гыч Григорьевмыт, Козловмыт; Советский район гыч Кожевниковмыт, Обуховмыт еш-влак. «Эрудиция – это у нас семейное» номинацийыште посна приз дене Волжский район гыч Кудрявцевмыт еш палемдалтын.
Сеҥыше радамыш логалше еш-влак кокла гыч Денис Шаблий, мутлан, конкурс нерген тыгерак ойлен:
– Конкурс моткочак поро шӱлыш дене эртен. Тыште соперник-шамыч лийын огытыл, чыла команде икте-весышт дене йолташыш савырненыт да родыштлан семынак ваш-ваш полшеныт.
Конкурсын таҥасымашыже-влак годым ме икте-весынам у шӧрын гыч ужынна: Дионисий эргына интеллектуал конкурслаште вучыдымо да чын вашмут-влакым пуэн, Маргарита авана «Крокодил» модышышто литературный произведений-влакын лӱмыштым артист семын мастарын ончыктен, а Наташа пелашем чыла спорт таҥасымашым моткоч сайын эртен. Конкурсыш ушнымаш мемнан ешнам утларак икояным веле огыл ыштен, эше тушто ме Юл кундемысе ятыр еш дене йолташ лийынна.
Финалыш путёвкым кучыктымаш, кок тӱжем еҥан аудиторийын совым кырымыже, сеҥыше-влакын интервьюшт да чылажат, мо мемнан дене вараже лийын, ик тат семын эртен каен. Сеҥыме нерген умылымаш шочмо Йошкар-Олашке пӧртылмӧ годым корнышто веле толын.
Торжественный церемонийыште «Росссий – йӧнан эл» АНО-н генеральный директоржын алмаштышыже Оксана Ачкасова палемден:
– Кум тылзе жапыште ме кугу элнан тӱрлӧ регионжо гыч еш-влак дене палыме лийынна. Нуно чыланат талантан, усталык шӱлышан да ваш келшен илыше улыт. Конкурсын площадкыштыже тӱрлӧ кундем гыч 1577 еш вашлийыныт. Да нуно чыланат сеҥыше улыт.
Полуфиналын пытартыш кечынже участник-влакым образовательный да куандарыше программе-влак вученыт. Еш-влаклан организатор-шамыч сюрпризым – актрисе, стендап-комик, телевӱдышӧ Елена Борщева дене вашлиймашым – ямдыленыт. Тудо участник-влаклан ешлан мыскара кузе пиаланрак лияш полшымо, пелашыже – спортсмен Валерий Юшкевич – дене нуным мо ушымо, ӱдырышт-влакым кузе ончен куштымо нерген каласкален. «Институт современной психологии и родологии» вузым негызлыше, психогенеолог Ксения Мосунова «Мыйын тыглай еш. Мо дене кугешнаш?» мастер-классыште ешыште икте-весым йӧратат да ваш-ваш полшат гын, кажныштыже кугешнаш амал уло манын палемден. А кас программым Стас Пьехан концертше сӧрастарен.
Тиде конкурсыш Российысе 89 регион гыч 102735 еш команде гыч 587250 еҥ ушнен. Нунын родышт тӱнян 81 элыштыже илат.
Конкурсын финалыштыже пӱтынь элна гыч 300 эн сай еш вашлийыт. Нунын кокла гыч кумытшо – Марий Эл гыч еш-влак.
Л.Камалетдинова
