Йошкар-Оласе епархиальный управленийын секретарьже иеромонах Серафим (Пасанаевым) Красноярский крайысе Минусинск ден Курагинский епархийын епископшылан шогалтеныт.
Тидын шотышто пунчалым Москон да Уло Русьын патриархше Кирилл Священный Синодын заседанйыштыже луктын. Кодшо рушарнян, Семёновкысо Юмым шочыктышо Пресвятой Авалан храмыште эртыше службо годым марий митрополит Иоанн, патриархын кӱштымыжӧ почеш, тудым архимандритын санышкыже пуртен.
Марий епархийын пресс-службыжын увертарымыж почеш, Серафим Пасанаев 1968 ий 24 апрельыште Йошкар-Олаште шочын. Саратовысо духовный семинарийым тунем лектын, проректорын воспитательный паша шотышто полышкалышыжланат ыштен. Йошкар-Олаш пӧртылмеке, епархийын миссионержын должностьышкыжо налыныт. Москосо духовный академийым тунем пытарен да кандидатлык пашам арален. 2015 ийыште епархий управленийын секретарьжылан шогалтеныт.
С.Носова
Снимкыште: юмын йӱлам шуктымо годым.
Фотом епархийын соцкылысе лаштыкше гыч налме.
