Россий студенчествын кечынже республикым вуйлатыше Юрий Зайцев Марий кугыжаныш университетыште шинчымашым погышо студент еш-влак дене вашлийын, нуным пайрем дене саламлен, тунеммаште сеҥымашым, илышыште йӧратымашым да умылымашым тыланен.
Тудо палемден: тений самырык еш-влак Россий Федераций президентын увертарыме Ешын идалыкшым палемдыме кышкарыште эртаралтше «Уло ешге» проектыш ушнен кертыт. Тиде мероприятийын тӱҥ шонымашыже – элыштына илыше-влак коклаште еш йӱлам вияҥдаш.
Вашлиймаш годым самырык еҥ-влак тачысе студент-шамычын ик эн тургыжландарыше йодышыштым пуэныт. Тыге нуно илыме верым саемдыме, учёный-влакын радамышкышт ушнышо рвезе тукымлан полышым пуымо шотышто ойленыт.
Тидын деч вара Марий Элым вуйлатыше университетыште 2010 ий гычак эртаралтше Ректор-влакын балыштышт лийын. Ты кечын тушко вузын чыла факультетше ик эн чолга 150 еҥже чумырген. Юрий Зайцев чылаштымат пайрем дене саламлен да палемден: студент молодёжь мемнан республикын шанче-технический, творческий куатшым вияҥда да у сеҥымаш-влакым конда манын, ӱшан уло.
Марий Эл Республикым вуйлатышын администрацийжын информаций паша пӧлкажын уверже-влак негызеш. Г.Кожевникова ямдылен.
