Шарныктыш сӱрет
Кугешнаш кумылаҥдышын
Марий Элнан рӱдолаштыже «Мариэнерго» филиалын энергообъектшым Кугу Сеҥымашын 80-ше идалыкше вашеш мурал (монументал живопись сӱрет) дене сӧрастареныт. Проект «Россеть» ГК-н тӱҥалтышыж почеш ышталтын.
Тидлан верым шоненак ойырен налме: тематике почеш граффити сӱретым 657-ше номеран КТП-ште ыштыме, тудо Воин-Интернационалист уремысе шуко пачашан илыме пӧрт-влак воктене верланен, а тушто Кугу Отечественный сарын участникше-влакын тукымышт илат, уремжыланат воин-герой-влак лӱмым пуымо.
Комплектный трансформатор подстанций пырдыжысе сӱретыште Кугу Отечественный сарын сайын палыме символжо-влак ончыкталтыныт: Сеҥымаш орден, пеледше олмапу укш, кум тӱсан Россий флаг, Сеҥымашын 80-ше идалыкше лӱмеш логотип. Пеледше олмапу укшыжо илыш ылыж тӱзланымым, тукым гыч тукымыш куснен толшо шарнымаш ден йӱла кокласе кылым, сеҥен утарыме, волгыдо ончыкылык да яндар кава тӱсым ончыкта.
Шарныктыш сӱретым почмаште «Рӱдӧ да Юл кундем Россеть» ПАО-н «Мариэнерго» филиалжын директоржо Сергей Хлусов, филиалын пашаеҥже да Самырык-влак советшын еҥже, «Энергокружокын» участникше-влак, тыгак Йошкар-Ола гыч уста художник Илья Белов лийыныт. Лачак пытартышыже тиде проектым илышыш пурташ полшен. Сергей Владимирович ты паша дене кылдалтше чыла еҥлан да, мутат уке, сӱретчылан таум ыштен.
Трансформатор подстанцийысе шарныктыш сӱрет – Кугу Сеҥымашын лӱмгечыж вашеш Марий Элнан рӱдолажлан энергетик-влак деч сай пӧлек. Тыге нуно элнан историйже дене кугешнымыштым почын ончыктеныт да молымат тидлан кумылаҥденыт.
Юрий ИСАКОВ.
Снимкыште: трансформатор подстанций пырдыжысе шарныктыш сӱрет.
Фотом «Мариэнергон» пресс-службыж деч налме.
