ЙӰЛА

Кугече Кугу Юмылан сортам чӱктен…

Кугече игече юалге лийын гынат, эрдене кече, кавам волгалтарен,

тамле омо деч помыжалтыш. Мӧҥыштӧ чылаштым саламлен, Йошкар-Оласе

«Мари Онар» кафешке вашкышна. Тушто Кугече пайрем эртен.

Йошкар-Оласе «Марий кумалтыш» общинын тӱҥ онаеҥже Юрий Тушнурцев да

Советский район гыч толшо карт-влак, Кугече Кугу Юмылан сортам чӱктен

пелештен, пайремым почыныт.

Онаеҥ-влак тыгак Тӱҥ Ош Кугу Юмылан, Ош Кече Авалан, Кугу

Серлагышлан, Агавайрем Юмылан пелештеныт.

Кугече – пӱртӱс вийлан тауштен кумалме пагыт. Пайремыш мийыше-влак тӱрлӧ чесым: марий тамган да шоган шӱм вӱдеш чиялтыме муным, мелнам, киндым, туарам, мӱйым, кугече когыльым да шийвундым конденыт.

Кугече Юмылан пелештыме годым сарзе патырна-влакымат монден огытыл.

Аралтыш дене коштышт, таза пӧртылышт манын йодыныт: «Ваш-ваш осал лавыра шомакым  кышкыме деч, осал сар деч, мемнан эргынам, салтакнам осал пычалтар, шикш деч арален шогыза».

Тылеч посна сурт-печым осал тӱтан мардеж деч, осал тул деч, чыла осал деч

аралтышым, серлагышым, икте-весе дене келшен илаш Юмо деч  йодыныт: «Идалык Юмо, Идалык Суксо, арня гыч арняш, ий гыч ийыш лишыл еҥ, ача-ава, ака-шӱжар, иза-шольо, родо-тукым, йолташ, пырля пашам ыштыше, тӱрлӧ йылман, тӱвыран калык дене келшен илаш серлаген шогыза».

Кугече пайремыш мийыше-влак тӱмыр да шӱвыр сем почеш латкок пура корка дене ташлама куштымаш йӱлам шуктеныт. Куштымо годымак пурам подылыныт. Эн ончыч пӧръеҥ-шамыч, а вара ӱдырамаш-влак кече почеш пӧрдыныт.

Уремыште марий Кугечын ик тӱҥ символжым – лӱҥгалтышым – келшытареныт. Тудын дене изижге-кугужге лӱҥгалтеныт, а варагармонь сем почеш тавалтеныт. Пайремыш мийыше уна-влак Марий юмыйӱла ушемын Йошкар-Оласе «Марий кумалтыш» общиныжлан, шӱвырзӧ ден гармоньчылан кугезе коча-кован йӱлам аралымыштлан тауштеныт.

  • М.СКОБЕЛЕВ,
  • Л.ШАБДАРОВА

М.Скобелевын фотожо

Опубликовать в Одноклассники

Добавить комментарий