Республикысе гидрометеослужбын увертарымыж почеш, Крешеньылан южын температуржо ты гана -2…-7 градус йӱшто лиеш.
Тидлан кӧрак Козьмодемьянскыште, Юриныште эсогыл Юл эҥерыште иорданьымат огыт келыштаре, молан манаш гын, ий вичкыж. Тудо 7 сантиметр кӱжгытыш гына шуэш. А чывылталт лекташ шонышо-влак тусо «Красный ключ» манме верыште тидым ыштен кертыт.
Йошкар-Олаште ты гана йӱштылаш вакым Вантовый кӱвар воктене, пляж деке лишке келыштарат. Утарыше ден «Вашкеполыш» бригаде-влак тушто 18 январтыште 18 гыч 19 январьыште 20 шагат марте дежуритлаш тӱҥалыт. Вургемым вашталтен чияш лӱмын шокшемдыме кабинкым вераҥдат.
Марий Элын Тазалыкым аралыме министерствыжын специалистше- влакын ончылгоч шижтарымыштымат шотыш налаш уто огыл: вӱдыш йӱшывуя пурыман огыл. Тидым ыштыме деч ончыч капым ырыктыман: изишак куржталман да разминкым ыштыман, капым тарватылман. Вӱдыштӧ ик минут деч утла лийман огыл. А тушеч лекмеке, капым махровый солык дене коштыман. Тидын деч вара шокшо чайым подылаш лиеш.
Светлана Носова
М.Скобелевын фотожо
