Тений Крешене пайремлан чывылалт лекташ Йошкар-Олаште, Изи Какшан эҥерыште, ий вичкыж улмылан кӧра лӱмын вакым ыштен огытыл.
Сандене кумылан-влак ола деч ӧрдыжтӧ верланыше памаш-влак деке коштыныт. Мутлан, Ежово селасе Мироносицкий памаш дене калык шуко лийын, а тушто чывылалт лекташ лӱмын купельжат уло, кодшо ийын тудым уэмден олмыктеныт. Вӱд налаш, купельыште чывылалт лекташ кумылан-шамычшат шукын лийыныт. Йӱдым тушто медик, утарыше-шамычат дежуритленыт.
Советский районысо Шабашанысе Казанский юмынавалан, Кужэҥер районысо Тумньымучаш ялысе «Сргей – руш», Изи Чарнур ялысе, Йӱледӱр селасе памаш-влак денат калык шуко лийын. Шабашаныште гын, вӱдым налаш черетше пеш кужу лийын, кок шагат наре шогашат логалын, увертарат соцкыл лаштыклаште.
Кеч Йошкар-Олаштыже Вознесений черке воктеке, Изи Какшан эҥерыште черке пашаеҥ-влак ырес сынан вакым кажне ийын ыштат да вӱдым шнуяҥдыме йӱлам эртарат. А святой вӱдшым черке кудывечыштак темкален пуэденыт.
Шернур районысо Тиман ял воктенысе памаш вӱдымат Марисола черкын пашаеҥже-влак шнуяҥденыт. Чывылалташ да вӱдым налаш шонышо-влак шукын тыгак лийыныт, эсогыл Киров кундем гычат толыныт.
Мо оҥайже, пайрем вашеш купельжын кумдыкшым ӱдырамаш ден пӧръеҥ-влаклан посна чывылалт лекташ келыштареныт. Тиде пашам шукташ верысе икмыняр предприятийын вуйлатышыже-влак полшеныт.
Волжский районышто Пӧтъял, Сотнур черкыла пеленысе памашлаште келыштарыме купельыштат вӱдыш пурышо-влак шукын лийыныт. Эшежым игечыжак ты йӱлам шукташ полшен манаш лиеш, леве лийын.
Светлана Носова
Снимкыште: Крешене кечын Изи Какшан энерыште.
Фотом «Православие в Марий Эл» воткы лаштык гыч налме.
