Шинчымаш кече вашеш ача-ава ден йоча-влаклан корно правил шотышто ушештараш уто огыл. Кеҥеж каныш пагытыште тидын шотышто тунар тургыжланыме огыл гын, тунемше-шамычын кажне кечын школыш кошташ тӱҥалмышт дене ты шотышто тӱткыш ончыл верыште лийшаш. ГИББД-н пашаеҥже-влак тыгак автомашинам виктарыше-шамычлан тунемме вер кундемыште кудалме годым сентябрьын икымше пелыштыже поснак тӱткӧ лияш йодыт.
А икымше классыш кайыше йоча дене ача-ава ты шотышто икмыняр кече почела мутланышаш, умылтарышаш да тиде веле огыл – мӧҥгӧ гыч школ марте пырля ошкылаш да ик эн лӱдыкшылан шотлалтше вер-влакым ончыктышаш.
Корно правил кокла гыч ик эн тӱҥлан теве мо шотлалтеш:
! уремын вес могырышкыжо корно гоч йолешке вончымо вер дене гына вончаш лиеш;
! лишне кудалын толшо транспорт ончылно корным вончаш ок лий – эртымыжым вучалтыман;
! автомобиль корныш вучыдымын куржын лекташ ок лий, поснак пушеҥге але вондерла шеҥгеч;
! йолешке корныш икымше ошкылым ыштыме годым уэш-пачаш кок могырыш ончалаш уто огыл;
! светофорышто ужар тӱс чӱкталтын гынат, корно гоч куржын эрташ вашкыман огыл – адакат тергыман, трук автомашина кудал лектеш.
Школыш коштшо икшывын ӱмбал вургемыштыже, рюкзакыште «светоотражающий» манме элементым пижыкташ кӱлеш. Тидым кызытак ыштыман, вет уремыште – шыже, ты пагытыште кас пычкемыш, игечыжат шукыжым пылан да йӱран лиеш.
Кугыжаныш автоинспекцийын пашаеҥже-влак автомашинам виктарыше-влаклан ушештарат:
Пагалыме водитель-влак! Тунемме вер тураште кудалме годым, транспорт чарнен шогалме тураште, йолешке вончымо верлаште поснак тӱткӧ лийза, скорость правилым шотыш налза да тыгодым йоча площадкым, тротуарым ончалаш уто огыл, вет южо годым тушеч икшыве-шамычым вучыдымын куржын лектын кертыт.
Г.Кожевникова
