Марий Эл вуйлатыше Юрий Зайцев еҥ-влаклан приёмым эртарен. Тушто икмыняр вере корным тӧрлаташ кӱлмӧ да моло йодышым тарватеныт.
Звенигово район Суслоҥгер поселко гыч Лилия Головкина ты илыме верыште Тыныслык уремыште корным ачалаш йодмаш дене миен. Палемдымыж почеш, кумдыкым тӱзатымылан пытартыш ийлаште кугу тӱткыш ойыралтеш. «Оласе йырвелым йӧнаным ыштымаш» федеральный проект дене келшышын Тыныслык уремысе кудывечылаште урным, теҥгылым вераҥденыт, меҥгылашке лампым сакеныт, проездым ыштеныт. Тыгодым уремысе корно тӧрлаталтде кодын.
Звенигово муниципал район администраций вуйлатыше Сергей Петров корным олмыктышашлан сметный расчет ышталтын манын каласен. Пашам 2025 ийыште шукташ палемдалтеш.
Вес йодышат тидын денак кылдалтын: Кужэҥер поселкышто илыше Александр Горинов райрӱдышкӧ наҥгайыше автомобиль корным шотыш кондаш йодын. Ты корно Кужэҥер ден Одывлак – Кужэҥер – Параньга автомобиль корным уша.
Республикын транспорт да корно озанлык министрже Александр Герасименкон ойлымыж почеш, «Илышлан инфраструктур» национальный проект дене келшышын тиде корным шушаш ийын тӧрлаташ палемдалтеш.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
