Национальный художественный галерейыште кодшо арнян моткоч оҥай темылан пӧлеклалтше выставке почылтын. Тудым «Корно» манын лӱмденыт.
Экспозицийыште руш сӱретче-влакын: Борис Кустодиевын, Исаак Левитанын, Станислав Жуковскийын, Константин Юонын, Юлий Клеверын… – .XIX-XX курымышто ямдылыме пашаштым ужаш лиеш.
Ик эн тӱҥ образлан, мутат уке, корно шотлалтеш. Радына-влакым ончымо годым тыгай шонымаш ушыш пура, пуйто пӱтынь элна мучко чодыра, олык, эҥер але ялла ден олала гоч эртена. Корныжат тӱрлӧ вашлиялтеш: кыдыр-кудыр шуйналтше йолгорно, кӱртньыгорно… Вӱд дене ийын кайыше ма юж дене чоҥештылше транспорт – чыланат садак корным эртат. Корно айдемын ӱмыржӧ, пӱрымашыже денат кылдалтын. Тидын нергенак каҥашат ыле студент-влак выставкысе паша-влакым ончен коштмо годым.
Сӱретче-влак идалыкысе кажне гаяк пагытшын моторлыкшым да ойыртемжым ончыктат, поснак теле дене кылдалтше радына-влак шукырак улыт. Очыни, нунын гоч чия мастар-влак луман, поранан игечысе корнын нелылыкшым ончыкташ шоненыт.
Ярославль оласе художественный тоштерын поянлыкшылан шотлалтше радына-влакым республикнан рӱдолаштыже ончыш «Тӱвыра» нацпроект йӧным ыштен.
Алевтина БАЙКОВА
Авторын фотожо
