Кӧргӧ виян, пеҥгыде койыш-шоктышан
Газетнан унаже – специальный военный операцийын ветеранже «Мужество» орден дене палемдалтше, тачысе кечылан регионышто следж-хоккей дене сборный командын участникше Алексей Блинов.
Пытартыш жапыште республикыште следж-хоккей нерген шуко ойлат. Шукерте огыл ты вид дене Нижегородский областьыште «Играем по-взрослому» всероссийский турнир эртен. Марий Эл гычат сборный вийжым терген. Тудо призёр коклаш логалын огыл, но участник-шамыч кӧргӧ вий-куатан улмыштым эше ик гана пеҥгыдемденыт, мастер-классым ончыктеныт, специальный военный операцийын моло модшыжо, ветеранже-влак дене палыме лийыныт.
Спецоперацийын участникше-влак «Марий Эл» газет редакцийышкат толыт. Мутланыме годым кеч изиш, но тусо илыш, задачым шуктымышт дене палдарат. Ты ганат мутна Алексей Блиновын боевой илышыж нерген рончалте.
– Алексей Валерьевич, спецоперацийыш шке кумылын каенда. Тидлан могай-гынат амал лийын?
– Медведево район Юбилейный посёлкышто ик классыште тунемме йолташем 2023 ий январьыште СВО-шко каен, а июнь тылзыште уке лиймыж нерген колынам. Тудын дене изинек пырля кушкынна. «Мыйже пӧръеҥ омыл мо? Йолташ верч кайыман, шочмо элем ончылно порысым шуктыман», – пӧрдын вуйыштем. Ик жап шонкален коштмо деч вара шым чыте, контракт почеш кайышым.
– Молын семынак ямдылалташ жапым ойыреныт, туныктеныт?
– Луганск станицыште ямдылалтынна. Специалист-влак сайын туныктеныт, умылтареныт. Кушко да молан кайымынам паленна, сандене лӱдмаш монь пешыжак лийын огыл. Чылажланат ямде лийынна. Варажым мемнам, ик тӱшкам, Запорожье область Работино кундемыш колтеныт.
– Алексей, тыланет нелын сусыргаш логалын…
– Штурмовой дивизийыште служитленам. Икымше задачым шуктымем годымак нелын сусыргаш логалын. Тунам ик татыште пӱтынь илышем волгенче семын эртен, но ушым йомдарен омыл. Кӧргӧ виемым погалтен, шканем шке икымше медицине полышым пуэнам. Сусыргымем нерген раций дене увертаренам. Варажым мыйым авакуатор дене луктыныт. Госпитальыште пел ий эмлалтынам. Пел йол деч посна кодынам, протезым шынденыт. Тыге пӱралтын гын, ончыкыжо у шонымаш дене илыман.
– Окопысо, блиндажысе илыш ӱмыр мучкылан шарнымашеш кодеш…
– Тушто икте-весым поддержатлаш тыршенна, лишкырак палыме лийынна, вет кумда элнан тӱрлӧ кундемже гыч лийынна. Шарнем, блиндажыште ик гитаре ыле, моштышыжо черет дене шоктеныт, жапым эртарыме семын тӱрлӧ анекдотымат каласкаленыт…
– Пеҥгыде койыш-шоктышан лияш спорт полшен?
– Тидыже чын. Школышто тунеммем годым футболла, хоккейла модынам, ече дене куржталынам. Тыге койыш-шоктыш пеҥгыдемын, дисциплинылан тунемме. Армийыште Саратов областьыште служитлымем годымат, тыгак спецоперацийыште, сусыргымем деч варат спорт моткоч кӱлеш лийын. А теве ынде тачысе кечын таза илыш-йӱла дене таҥлалтмым чыла шотыштат шкешотан полыш, шӱкалтыш семын палемдем.
– Те паралимпийский видыш ушненда. Тидлан кӧ-гынат темлен?
– Тренерем Сергей Анатольевич Кугергин деке мийымекем, тудо «Корта» ече базыште коштын ончаш темлен. Тыге, шкан физический формым кучаш манын, тӱҥалтыште эркын-эркын 5-6 километрым эртенам. Эрыкан йӧн дене куржталаш огеш лий, но классик йӧн дене кертмем семын коштам. Вара «Защитники Отечества» кугыжаныш фондын регионысо филиалыштыже Россий кӱкшытан таҥасымашке миен толаш темленыт. Келшенам. 12-18 мартыште Ханты-Мансийскыште спортын теле видше дене «Кубок Защитников Отечества» всероссийский таҥасымаште Марий Эл гыч Никита Михайлов дене коктын вийнам тергенна. Мый («лыжные гонки стоя» классыште) 25-ше, а биатлонышто 20-шо лийынам, а Никита шинчын таҥасымаште («лыжные гонки сидя» классыште), биатлоныштыжат лу эн тале спортсмен-шамыч коклаш логалын. Тунам элнан 60 регионжо гыч участник-влак – кӧн кидше, а кӧн йолжо уке – кузе кертынна, туге выступатленна.
– Следж-хоккей дене командышкат ушненда…
– Ушненам. Ончыч спецоперацийын ветеранже-влакым Дзержинск олаш намиеныт. Тушто следж-хоккей дене элнан чемпионатше эртен. Оҥай лийын.
Республикыште спецоперацийын ветеранже-влаклан тӱткышым ойырашак тыршат, полшат, а полыш, поддержке моткоч кӱлыт.
Кадр шотышто «Герои Марий Эл» регионысо программе илышыш шыҥдаралтеш. Мыланемат военкоматыште паша верым темленыт, келшенам. Тыгак костыльым, протезым, ортопедический йолчиемым пуэныт.
Лишыл жапыште куржталаш келшыше протезым ямдылышаш улыт. Спецоперацийыште нелын сусыргышо моло ветеран-влакланат йӧсылан вуйым пуаш огыл манын темлем. Вий-куатым, йӧным муын, ончыко кайыман, илышын сайжылан ӱшаныман.
– Спецопераций кайыме кумдыкыш гуманитар полышымат колташ тыршеда?
– Тидын деч посна огеш лий. Тылын полышыжо тушто чот кӱлеш. Тидым шкем гыч палем. Йӧн лектын, да дивизийысе кок гана сусыргышо боевой йолташлан мотоциклым налын колтенам. Вара эше оксам поген, УАЗ машинам налын колтенна. Тау тылыште тыршыше, гуманитар полышым чумырен колтышо чыла еҥлан. Ик ой дене гына шонымашке шуаш лиеш.
Геройна-влак илышын нелылыкше дене тӱкнышӧ моло еҥ-шамычлан кумылаҥдыше да тыгак кӧргӧ виян улмышт дене пример улыт. Ме нунын ончылно вуйнам савена.
Елена Эшкинина
