Нальчикыште «Покорители вершин» моторлык да усталык конкурс эртен. Тушто элнан 11 регионжо гыч инвалид коляске полшымо дене куснылшо 17 ӱдыр участвоватлен. Марий Эл гыч Йошкар-Олаште илыше Наталья Ошаева (снимкыште) миен да «Мисс Очарование-2024» номинацийыште сеҥышыш лектын.
Наталья илыш корнышто вашлиялтше чыла гаяк нелылыкым сеҥыме да шонымашым илышыш пуртымо шотышто шуко еҥлан пример. Тудо «Дебют» бальный куштымаш шотышто образцовый ансамбль (вуйлатышыже – Анна Соколова) ден Инвалид-шамычын всероссийский обществыштын Марий регионысо мер организацийыштын (вуйлатышыже – Наталья Богомолова) тӱҥалтышышт почеш пашам ыштыше «Жизнь в танцах» социально-инклюзивный проектыште ынде вич ий чолган участвоватла.
– Тений Кабардино-Балкарий Республикын Нальчик олаштыже инвалид коляске полшымо дене куснылшо ӱдыр-влаклан организоватлыме «Покорители вершин» моторлык да усталык конкурсыш мыйымат ӱжыныт, – каласкала Наталья. – Тушко тыгак Карелий, Татарстан, Донецк калык республикла, Пермь край, Ленинград, Москва, Тверь, Оренбург, Ростов областьла гыч ӱдыр-влак ушненыт. Конкурсыш «Чылдырий кидшол» марла куштымаш дене миенам. Тудын полшымыж дене Марий кундемын шӱлышыж ден моторлыкшым, калыкын ойыртемжым почын пуэнам. Тыршымем арам лийын огыл: жюри «Мисс Очарование-2024» номинацийыште сеҥыше семын палемден. Конкурсыш ямдылымылан, Нальчикыш миен толаш полшымылан поснак хореографем Анна Соколова ден регионын Паша да социальный аралымаш министерствыжлан, министр Марина Островскаялан тауштем.
Нальчикыште ӱдыр-влак палыме лийыныт да вашла мутланеныт веле огыл, тыгак кумдан чапланыше Эльбрус курыкыш кӱзеныт.
Маргарита ИВАНОВА
Фотом Н.Ошаеван ВК соцсетьысе лаштыкше гыч налме
