Шернур посёлкысо тӱвыра пӧртыштӧ Татарстан Республикын Кукмара районысо Курыкӱмбал ялын шочшыжо, а кызыт Шернур посёлкышто илыше Юрий Ахтямов чапле лӱмгечыжлан пӧлеклалтше «Шернур, мый тыйым йӧратем!»концертым эртарен.
Тушто ты кундемыште шочын-кушшо да эстраде аланыште палыме шӱдыр-влак Алина Егошина, Любовь Купсольцева, Эльвира Попова, Марина Воронцова, Инна Килеева, Вячеслав Дудин, Александр Мамаев, самырык мурызо-влак Светлана Антонова, Лариса Еменгулова-Кузьмина, Дмитрий Веденькин, Алексей Горинов сылне йӱкышт дене куандареныт. Концерт программым тыгак «Пӧлек», «Грация», «Ласточка» ансамбль-шамыч куштымаш дене сӧрастареныт.
Пайремыш погынышо-влак юбилярын ямдылыме «Шергакан Шернурем», «Курыкӱмбал» видеоклипше-влакын икымше ончышышт лийыныт.
Концерт деч погынышо шийвундым Ю.Ахтямов Шернурышто землякышт, поэт да киноактёр Йыван Кырлалан шарныктыш кӱым вераҥдышаш пашалан пуэн.
А.БАЙКОВА
