Кодшо рушарнян Йошкар-Олаште, Изи Какшан эҥер сер воктенысе Тумер аланыште, «Чарла колшӱр» фестиваль кокымшо гана эртен.
Кодшо ийын шым команде гына ушнен гын, тений 20 команде толын. Кажныже шкенжын ойыртемалтше рецептше почеш колшӱрым шолтен. Чылажымат тамлен ончаш, манаш веле. Озаже-влак вараже калыкым чылт яра сийленыт. Авызлымыжат керек, команде-влакын шӱрым шолтымыштымак ончаш куанле ыле. Ончылгоч шӱрлан чыла ямдылен конденыт. Колжымат кажнышт шке денышт кучен, чеслан лӱмым шонен ямдыленыт. Конкурс тӱҥалмеке, команде-влак шкенышт дене оҥайын палдареныт.
Мутлан, Оршанке район гыч комсомол ветеран-влакын командышт моло семынак СВО-ш шуко посылкым колтен шогат: сетьым пидыт, окоплык сортам ыштат, пакчасаска гыч кукшо шӱрым ямдылат, чай шудым погат… Кол шӱржым гын шылагол, шийгол, форель дене шолтеныт, эше тушко тулото гыч йӱлышӧ пу комылямат чыкалтен луктыныт.
У Торъял район гыч толшо командым муниципал район вуйлатыше Евгений Небогатиков шкежак конден. Шӱрым шолтымо аланжымат нуно кудо-кафе семынрак тӱзатеныт. Мо оҥайже, ты районын гербыштыжат колым ужаш лиеш.
Кужэҥер район гыч Юрий Волковын вуйлатыме командыжымат мокталтыман. Тушто тӱҥ шотышто СВО-што вуйым пыштыше сарзе-влакын авашт, пелашышт, шочшышт лийыныт. Ӱдырамаш-влак уна-шамычым свежа пакчсасаска, кум тӱрлӧ чай дене сийленыт. А колшӱрышт – йылмет нелат. Юрий тудлан Унерка ден Сеснур плотиналаште карпым, тото колым, каракам, шереҥгым кучен. Вара чыла тидым чыве лемеш шолтеныт.
Чыкма гыч толшо командын ӱстембалже кугу тарелка тич шолтымо рак дене ӧрыктарыш.
Параньга гыч командым СВО-н ветранже Альбирос Агапов вуйлатен. «Тале колызо», – тудын нерген каласышт молышт. Сеткыште улшо колжымат ончыктыш. Марий Турек гыч командын девизшат ушеш кодо: «Пырля вучена, пырля полшена».
«Шочмо элым аралыше-влак» фондын регионысо пӧлкажат ынде кокымшо ий фестивальыш ушна.
Фестивальын кокымшо ийыштак тыгай популярный лиймжым умылтараш неле огыл. Тиде – кочкыш пайрем гына огыл, еш, патриотический шӱлышан мероприятий, тудо тӱрлӧ ийготан еҥ-влакым уша. Специальный военный операцийын участникше-влак сарзе йолташышт дене вашлийын кертыт.
«Чарла хутор» казак обществын атаманже Евгений Пушкинын ойлымыж почеш, ты фестиваль лач СВО участник ден нунын ешыштлан эртаралтеш. Пырля чумыргаш, мутланаш, пӱртӱс лоҥгаште каналташ лиеш. Икшыве-шамычлан мороженыйым яра пуэденыт, посна программым эртареныт.
«Фестивальыште кӧ сеҥыме тӱҥ огыл. Ме СВО-што сеҥышаш улына. Тек мемнан сарзына-влак таза да илыше пӧртылыт», – каласен атаман. Мероприятий годым сарзе операцийыште улшо-влаклан да нунын ешыштлан тӱрлӧ полышым пуышо пунктат пашам ыштен.
Фестивальым теният Марий Эл правительстве полшымо дене «Чарла хутор» казак-влакын обществышт, Марий Элын Спорт министерствыже, Йошкар-Ола адмнистраций, «Шочмо элым арлыше-влак» фонд, «Боевое братство» организаций да Военно-исторический обществын республикысе пӧлкаже иквереш эртареныт.
«Эн тӱҥжӧ – пырля ушнымо шӱлыш. Ме чыланат ик еш гай улына, кушто чыланат икте-весылан полшат», – палемден Марий Элысе «Шочмо элым аралыше-влак» фонд вуйлатышын алмаштышыже Елена Яшметова. Тудо ты мероприятийым эртарымашке ушнышо социальный координатор-влаклан туштен.
Конкурс семын эртыше колшӱр пайремыште ойыртемалтше-влакым веле огыл, кажне командым участник семын палемденыт. Сцене гыч организатор-влакын еҥышт саламленыт, мурызо, ансамбль-влак кумылым нӧлтеныт. Пайремым сӧрастараш Самара область гыч «Волжские казаки» коллектив лӱмын толын.
Светлана Носован фотожо.
Снимкыште: Кужэҥер район гыч толшо команде
