26 февральыште Йошкар-Оласе Самырык-влакын полатыштышт Марий Эл Молодёжный парламентын кумдаҥдыме заседанийже форсайт-сессий форматыште эртен.
Тушто Кугыжаныш Погынын депутатше-влак, Молодёжный политике комитетын, Образований да науко, Финанс министерстве-шамычын, Национальный банк пӧлкан, Финанс грамотность рӱдерын еҥышт, тыгак преподаватель-шамыч, муниципал образований-влакын вуйлатышышт, район ден ола администрацийлаште самырык тукым дене пашам ыштыше специалист-шамыч участвоватленыт.
Заседанийыште регионын самырык да чолга еҥже-влак ӱжмӧ участник-шамыч дене пырля Марий Элыште молодёжный инициативный бюджетирований йодышым вияҥдыме нерген мутланеныт. Форсайт-сессийыште модератор семын Кугыжаныш Погын председательын алмаштышыже Наталья Козлова, «Инициативный бюджетирований консультант-влакын альянсышт» АНКО-н директоржо Михаил Шевелев да бизнес-тренер, «Архипелаг» ден «У жаплан виян шонымаш-шамыч» федеральный проект-влакын экспертше Ольга Кабанова пашам ыштеныт.
Теорий ужашым колыштмо деч вара участник-влак индеш командылан шелалтыныт да шке олаште, районышто, селаште, школышто, тулеч моло верыште шукертак шонен коштмо проектыштым: муниципалитетлаште самырык тукымлан кумдыкым, самырык еш-влаклан рӱдерым, школлаште каныме зоным, пеҥгыде торым посна-посна погымо йӧным, планетарийым, кванториумым, профессий фестивальым, шонымаш ден проект-шамычым погымо базылан интернет-платформым – ямдылыме да илышыш пуртымо паша дене кылдалтше заданийлам шуктеныт. Каҥашыме жапыште проект-влакын авторышт шонымашым илышыш пуртышашлан лачшымак мо: калык, шинчымаш, шийвундо да тулеч моло – кӱлмым рашемденыт.
Заседанийыште Молодёжный парламентын йыжыҥъеҥже-влак молодёжный инициативный бюджетированийын кум модельже дене палыме лийыныт да нуным регионыштына вияҥдыме йӧн-влакым рашемденыт.
Молодёжный инициативный бюджетирований самырык тукымым верысе кучем кӱкшытыштӧ пунчалым лукмашке ушымо пашаште ик эн тӱҥ инструментлан шотлалтеш. Тудо самырык-шамычлан шке шонымашым луктын каласаш, шочмо олам, районым але элым вияҥдымашке шке надырым пышташ йӧным ышта, лидерын качествыжым вияҥдаш да командыште пашам ышташ тунемаш полша.
Молодёжный парламентын бюджет, молодёжный предпринимательстве да пашам ситарымаш комитетшылан форсайт-сессийым иктешлыме деч вара Марий Эллан келшен толшо инициативный бюджетированийын модельжым ойырен налаш, исполнительный кучем орган-шамыч дене пырля нормативно правовой актын проектшым ямдылаш да паша лектыш нерген Кугыжаныш Погынышко увертараш кӱштымӧ.
Молодёжный парламент тыгак республикын депутат корпусшылан Молодёжный парламентлан законым лукташ правам пуымо нерген темлымашым Марий Эл Конституцийыш тӧрлатымаш нерген законын проектше семын ончаш колташ пунчалын.
Заседанийын тӱҥ цельже самырык-влакын илышыш пурташ шонымо проектыштым пален налме, тидлан могай полыш, ты шотыштак кучем велым, кӱлмым колмо да умылымо дене кылдалтын, кугу мероприятийым иктешлыме годым палемден Н.Козлова. Команде-влак пашам пырля ыштыме годым проектым могай кӱкшытыштӧ илышыш пурташ лиймым, тудым кӧн шуктен кертмыжым, конкурс комиссийым кузе чумыраш кӱлмым, эн сай молодёжный проектлам ойырен налме йӧным рашемденыт. Чыла тиде самырык тукымлан инициативный бюджетированийын направленийжым чолгаҥдаш, республикыштына илыше самырыкъеҥ-шамычлан кӱлешан проектлам регионын финанс полышыж дене илышыш пурташ полшышаш.
М.ИВАНОВА
Марий Эл Кугыжаныш Погынын пресс-службыжын фотожо
