Кодшо кечылаште Чарла кремльыште СВО-н ветеранже ден Герой-влакын ешыштын II республиканский форумышт эртаралте. Тудо «Защитники Отечества» фондын Марий Элысе филиалжым почмылан 2 ий теммылан пӧлеклалтын.
Мастарлык класс, модмаш …
Мероприятийым торжественно почмо деч ончыч да варажат кремль кумдыкышто кумылан-влак спорт модмашыш, викториныш ушнен кертыныт, тазалыкыштым тергашат йӧн лийын. СВО-што лийше ден тушто вуйыштым пыштыше салтак-влакын лишыл еҥыштлан «Работа России» кадр рӱдерын специалистше-влак консультацийыштым темленыт. Форум жапыште «полевой кухньо» пашам ыштыш. Тӱрлӧ мастарлык класс ден выставкымат ончыктышт. Мутлан, БПЛА кузе пашам ыштыме дене палдарышт, Калашниковын автоматше дене лӱйкален ончаш йӧн пуалте. Туштыжо мыят шкемым тергышым. Эн покшеке изиш гына ыжым логалте. А теве, мут толмашеш, электрон пикш дене лӱйкалымаште (кушко логалме электрон экраныште ончыкталтеш) вигак «десяткыш» логалтышым!
СВО-што ӱмыр лугыч лийше участникын пелашыже Ольга Иванован эртарыме мастарлык классше моткоч келшыш. Тудо спецоперацийыште улшо-влаклан «Браслет выживания» кидшолым ышташ туныктен.
– Молан тыге маналтеш? Браслет ик гана шупшылмо денак рончалтеш да ныл метран кандырашке савырна. Тиде – парашютын стропаже. Моткочак пеҥгыде. Сандене СВО-што кӱлеш лийме годым кеч-куштат кучылташ лиеш, – палдарыш самырык ӱдырамаш.
– А тиде амулет-аралтыш-влак улыт. Нуным госпитальлашке колтедена. Тушто боец-влаклан пуэдат. Тидын дене палдарена: ме эре пеленыштак, воктеныштак улына.
Мастарлык классыш ача-аваже да изаже-шамыч дене толшо 7 ияш Даша нерген поснак ойлымо шуэш.
– Мый СВО-шко шке кумылын каенам. Ӱдырем тушко аралтышым ыштен колтен. Идалык ончыч мӧҥгышкӧ пӧртылынам. Ынде Даша «Браслет выживания» кидшолым иктаж салтаклан полшыжо манын ыштен колтынеже. Тыгай мастарлык класс лийшаш нерген пален налмекше, тышке лӱмын толын, – палдарыш ачаже Сергей Хабибуллин. Могай молодец ӱдыр!
Мыят браслетым ыштымашке ушныде шым чыте. СВО-што улшо иктаж боецлан полшымашке шкемын изи-и гынат, но надырем пыштем манын шонен, кумылемак нӧлталте. Вет Ольган ойлымыж почеш, мӧҥгыштыжӧ шкенжын ыштымыжымат, тыште ямдылымымат спецопераций кайыме верыш, утларакше госпитальлашке, колтена манын палемдыш.
Тауштымо семын
Форумышто ик эн тӱҥ татлан «Отец Героя» проектын кокымшо этапшын презентацийжым шотлыман. Но тиде тыглай выставке гына лийын огыл. Тидым чын патриотым ончен куштышо землякна-влаклан тауштымо шкешотан йӧн семын аклыман.
Фотовыставкым пурла пырдыж мучко манме гаяк вераҥдыме ыле. Ала кумылем тыгай лийын, ала весе – мо-гынат, тушто ончыкталтше рвезе ден пӧръеҥ-влакым мый гын ласкан ончен шым керт. Кузе икымше фотографийыште ача ден эргым ужым, туге логараҥ пышкемалте. А кунам шинчавӱдыштым пыкше кучен шогышо ача да южо ача пелен ава-влакым ужым, икмынярышт дене мутым вашталтышым, тунамже кумыл эшеат чот тодылто, да вӱдыжгышӧ шинча дене мут деч посна ваш ончышна… Арам огыл, ончыко пурен каласаш гын, тиде фотовыставкым ончен савырнымыж годым республик вуйлатыше Юрий Зайцев кажнышт воктене чарналтыш, кидыштым кучыш да мутланыш.
Ончер дене палыме лиймекше, мероприятийын торжественный ужашыжым Марий Эл вуйлатыше почо. Тудо палемдыш:
– Фондышто пашам ыштыше-влаклан таум ойлынем. Нуно вуйыштым пыштыше рвезе-влакын аваштын, ачаштын, пелашыштын чон коржмыштым шке шӱм-чонышт гоч колтат. Россий президент Владимир Владимирович Путин каласен: «Работа фонда «Защитники Отечества» – это миссия от Бога». Тиде тыгак.
Юрий Зайцев ӱшандарен ойлыш: республикын правительствыже боец-влаклан да нунын ешыштлан ончыкыжымат полшаш да тидлан чыла вийым кучылташ тӱҥалеш.
Спецоперацийын ветеранже ден участникше, нунын ешыштым, фондын филиалжын пашаеҥже-влакым тыгак Марий Эл Кугыжаныш Погын председатель Михаил Васютин саламлыш.
– Кок ий жапыште фондыш кандаш тӱжем утла еҥ толын. Нунын кокла гыч иктат тӱткыш деч посна кодын огыл. Марий Эл правительствын полшымыжлан кӧра мемнан фонд тугай ошкылым ыштен, вес регион-влак тыгай пашам эше тӱҥалыт веле. Кодшо кечылаште Россий Федерацийын президентше спортын адаптивный видшылан концепцийым ышташ кӱштыш, а республикыштына хоккей дене адаптивный команде икмыняр жап ончычак ышталтын.
Тыгак социальный координатор ден волонтёр-влак лӱмешат тауштымо мут йоҥгыш.
«Защитники Отечества» кугыжаныш фондын республикысе филиалжын вуйлатышыже Ренат Магсумов мемнан пашана – тиде специальный военный операцийын участникше, мемнан геройна, нунын аваштлан, пелашыштлан полшымаш, служитлымаш манын палемдыш. Ойлымыж почеш, кок ий жапыште Марий Эл вуйлатыше филиалын чыла йодмыжлан полшен.
Саламлыше-влак кажныже спецоперацийын икмыняр участникшым палемдышт. Тыгак фондлан полшышо икмыняр еҥлан Таумутым кучыктышт.
Палемдыман Григорий Кузнецовым. Тудо СВО-н ветеранже-влакын ассоциацийыштым вуйлата. Тыгак фондын координаторжылан ышта. Ойлымыж почеш, республикысе филиалыште СВО участник-влакым пашашке пуртымо шотышто йодышлан вуйын шога.
Форумышто изирак концертым ончыктышт. Нунын коклаште «Жена Героя. Мать Героя» фотопроектыш ушнышо икмыняр ава ден пелаш улыт ыле. Но ты гана нуно мутым ышт ойло, а чумырымо «Сильные духом» вокал ансамбльышт дене «Гимн солдатских матерей и жён» мурым йоҥгалтарышт. Тидыже чонышко эшеат чот логале да моткочак кугу чаманымаш, тунамак кугешнымаш шижмашым лукто.
Любовь Камалетдинова.
Михаил Скобелевын фотожо.
