Таче тендам Советский район Колянур ялыште илыше Александровмыт еш да нунын суртышт дене палдарем. Мийымем годым суртоза Эрик Григорьевич лачак кудывечыште шогылтеш ыле.
– Мый Морко район Курыкйымал ялыште шочын-кушкынам. Ты кундемыш еш дене 1986 ийыште толынна. Колянурышто ушкал ден сӧсна ферме лийыныт, сандене зоотехниклан заочно тунем лектынам. Кандаш ийым верысе озанлыкыште пашам ыштенам. Варажым, пенсийыш лекмешке, вахте дене Москош, касвелыш кошташ верештын. Паша уке, окса кӱлеш! – каласыш пӧръеҥ.
– Мый Элекэҥер гыч улам. Курыкйымал ялысе кевытыште ыштенам, каласыш пелашыже Христинья Петровна.
– Колянурыш Валерий Новиков деке пашаш толынна, – умбакыже мутшым шуя Эрик Григорьевич. – Тунам тысе «Рассвет» колхоз, руш манмыла, «гремел». Пашам ыштыше специалист-влаклан Вечын посёлкышто пачерым пуэныт. Сайын иленна: паша вер ден пашадар ситышын лийыныт. Но варажым чыла пытыш.
Ты кундемыш Александровмыт эше ик амаллан кӧра илаш кусненыт.
– Еш кугемын, кумшо йоча шочын, сандене илаш вер кӱлын. Суртым 1991 ийыште ышташ тӱҥалынна. «Рассвет» колхоз материал дене огыл, а технике дене полшен. Окса шагал лийын, садлан вольыкым ончаш верештын. Пӧртым индеш ийым чоҥымо. Вахтыште ыштыме окса дене гына тудым нӧлташ логалын. Адакшым йоча-шамыч кушкыныт, нуным чикташ-пукшаш кӱлын. Суртым илымыж годым ачам Пётр Тимофеев, чыла родем-шамыч ышташ полшеныт. Пӧрткӧргым Дмитрий эргым шотыш конден. Кызыт тудо Йошкар-Олаште, МЧС-ште, пожарныйлан тырша. Суртышто электровоштырым, вӱд пучым тудак шупшын.
Вара суртоза дене оралтым ончен лекна. Пакчаште чылажат уло. Мланде паша деч посна ялыште илаш огеш лий.
– Кушто шочынат, туштак кӱлеш лият, – мыйын семын шонкала суртоза. – Кайык-шамычат шокшо кундемыш каят, а вара садак тышкак пӧртылыт. Мыланна Килемар монастырьыштат пашам ышташ логалын. Тушто коҥгамат оптымо, суртым, столяркым, мастерскойым, илыме пӧртым нӧлтымӧ. Кушто гына пашам ышташ логалын огыл.
Мутланен-мутланенак уремыш лекна. Шем мландым икымше лум леведын. Игече юалге да тӱтыран.
Вӱта воктене четлыкыште лудо-влак койыт. Пакча мучаште изи поликарбонат дене ыштыме беседкым вераҥдыме. Суртозан ойлымыж почеш, шукерте огыл суртымат олмыкташ логалын: негызым уэмдыме, окнаянак йымалысе тошто пырнямат вашталтыме.
Шке жапыштыже Эрик Григорьевич коҥгамат оптен, окнасергам ыштен, чоҥымо пашаште лиймыж годым столярланат тыршен. Колянурышто теве могай шӧртньӧ кидан айдеме ила.
М.СКОБЕЛЕВ
Авторын фотожо
