Коҥга – пӧртын чонжо
Морко район Ӱшӱттӱр ялыште лиймына годым верысе кидмастар, коҥгам оптышо Вячеслав Васильевич Васильев палыме лийынна. Пӧръеҥ ончыч «Дружба» колхозышто механизаторлан пашам ыштен, Т-150 трактор дене коштын. Пелашыже Валентина Григорьевна эн ончыч Моркышто «Контакт» заводын филиалыштыже тыршен, вара ик жап повар лийын.
– Суртна Ключевая урем тӱрыштӧ верланен. Ӱшӱт коремжат – воктенак. Ялын лӱмжат тиде вер дене кылдалтын. «Дружба» колхозна 2005 ийыште пытен, а мый тушеч 2003 ийыште каенам. Эн ончыч коҥгам шкаланем у суртлан йӧршым оптенам. Вара Олег родемлан, жап эртымеке, тудын Лёня шольыжлан оптен пуышым. Тыге эркын тиде сомыллан тунем шуынам, – мане Вячеслав Васильев.
– Кундемыштына газ пучым шупшмо огыл, санденак коҥгам опташ тӱҥалынам. Илен-толын, ялышкына газым пуртат манын ӱшанена. Кызыт мо уло дене серлагена, йӧным кычалына, – умбакыже ойла суртоза.
Коҥгам Вячеслав Васильевич 1995 ийыште опташ, суртшым 1992 ийыште нӧлташ тӱҥалын. Пӧртым чоҥаш родо-тукымжо полшен. Коҥгалан кермычым Пермь да Шупашкар олала гыч кондат. Келшыше кермычше тушто веле.
– Коҥгам опташ, М150 маркан тичмаш кермыч ден оптыман. Айда-лийже кермычым кучылташ ок йӧрӧ, растворымат ыштен моштыман, – умылтара пӧръеҥ.
Суртоза коҥгаштыже духовкым келыштарен. Тушто кочкышым ямдылаш моткоч йӧнан. Васильевмыт шорыкым, сӧснам ашнат.
А ялыште 25 сурт наре уло. Пошкудо-влак келшен илат. Шке вий дене, оксам поген, корным, кӱварым ачаленыт. Теве тыге икет-весылан полшен, ваш эҥертен илат Ӱшӱттӱр ялыште.
Михаил СКОБЕЛЕВ,
Лидия ШАБДАРОВА
Михаил Скобелевын фотожо
