Ирина НАГИБНЕВА, С.Г.Чавайн лӱмеш калыкле книгагудын тӱҥ библиотекарьже:
– Идалыкысе книга» республиканский конкурсым 20 ий ончыч эртараш тӱҥалме. Могай амал дене? Ончалза: Марий Элыште книгам лукшо издательстве-влак эреак эре чолган, кугу лектышан пашам ыштеныт, тӱрлӧ кӱкшытан – всероссийский, тӱнямбал, регион-влак кокласе – конкурслаште сеҥыше-влак радамыш лектыныт. А шкенан республикыште нимогай конкурс уке… Тыге 2005 ийыште книгагудо директорын алмаштышыже Любовь Владимировна Васютинан темлымашыж почеш тӱҥалтышым пыштыме. Тунам 227 йодмаш пурен, сеҥышыш В.М.Васильев лӱмеш МарНИИЯЛИ-н «Марийцы» лӱман тӱшка монографийже лектын.
Конкурсыш йодмашым пуышо-влакын чотышт ий еда шукемыныт. Теве:
1-ше конкурс (2005) – 227,
2-шо конкурс (2006) – 125,
3-шо конкурс (2008) – 260,
4-ше конкурс (2010) – 282,
5-ше конкурс (2012) – 348 (эн шуко!),
6-шо конкурс (2014) – 292,
Тыге моло ийлаштат.
Номинаций-влак шотышто ончалаш гын, нуно коклан-коклан вашталтыт. Южыжым кораҥдаш перна, жаплан келышыше вес номинацийлам ешарена.
Тенийысе XI конкурсыш 67 автор деч 261 йодмаш пурен. Нунын коклаште: руш йылме дене – 182, марий йылме дене – 79, 68 монографий да тунемме пособий, 29 йоча да самырык-влаклан книга, 37 поэзий сборник, 33 прозо произведений, посна ойырымо патриот темылан – 18 книга.
Ончылно – Марий тиште кече. Уэш пырля погынена да идалыкысе книган лӱмжым пален налына.
Лидия СЕМЕНОВА ямдылен
Фото: «Марий Эл» увер агентстве/»Марийская правда» газет
