Эрла, 24 августышто, пӱтынь Россий мучко «Кино йӱд» акций эртаралтеш. Тудо Россий кино кечылан пӧлеклалтеш. Ты кече 27 августышто палемдалтеш.
Акцийыш Марий Элат ушна. Тений йодмашым 16 учреждений пуэн. Кинофильмым Медведево, Морко, Параньга, Шернур, Приволжский поселкылаште да Волжск олаште тӱвыра да каныме рӱдер-влак ончылно площадкылаште ончыктат. Советский поселкышто еҥ-влак рӱдӧ площадьыште, Юрино поселкышто рӱдӧ паркыште чумыргат. Звенигово олаште кумылан-влак «Мечта» кинозалыш погынат. Йошкар-Олаште акцийыш Тӱвыра да каныме рӱдӧ парк ушна. Килемар, Кужэҥер, Марий Турек, У Торъял, Оршанке поселкылаште да Козьмодемьянск олаште фильм DCP формат дене уэмдыме, жаплан келшыше кинозаллаште лиеш.
«Кино йӱд» дене келшышын, Российысе кинематографист-влакын кум у пашаштым: «По щучьему велению» йомакым, «Сто лет тому вперёд» фантастике блокбастерым да «Воздух» военно-исторический драмым – ончыктат.
Чыла вереат фильмым яра ончаш йӧн лиеш.
Любовь Камалетдинова
