Шокшо игече шогымо дене еҥ-влак эҥер ден ерлашке йӱштылаш пураш вашкат.
Теве мемнан верланыме Печать пӧртын 7-ше пачашыж гычат Изи Какшан эҥерыште да серыштыже ятыр еҥ улмым кажне кечын ужына.
Но йӱштылмӧ годым, туткар ынже лий манын, правил-влакым шотыш налаш мондыман огыл. Нуно тыгай улыт:
– кушто утарыше-влак уке улыт, тыгак йӱштылаш чарыме верлаште вӱдыш пурыман огыл, молан манаш гын эҥер, ер але пӱя пундаште кушкыл, шӱкшак, моло кӱлеш-оккӱл лийын кертыт;
– вӱдын келгытшым палыде, тушко тӧрштыман огыл, уке гын кӱш, кийылтше моло торыш керылташ лиеш;
– йӱштылаш келыштарыме верыште «буйки» манме деч торашке ийын кайыман огыл;
– йӱшывуя йӱштылаш пурыман огыл.
Ача-ава-влаклан шарныман:
- йочам йӱштылаш пуртымо деч ончыч вӱдын температуржым тергыман;
- икшывым ик татланат эскерыде кодыман огыл, вет вӱд йымаке каяш жап шуко огеш кӱл;
- йочалан вӱдыштӧ да серыште шкем кузе кучымо шотышто правил-влакым туныктыман;
- вӱдыш пурымыж годым икшывылан кругым пуыман але кидышкыже нарукавникым чиктыман.
Иктаж-кӧ вӱд йымаке каяш тӱҥалын гын, мом ыштыман?
- Полшаш йодын кычкырыман;
- тудлан вӱд ӱмбалне лияшыже полшен кертшым иктаж-мом, мутлан, мечым, камерым, кругым кудалтыман;
- утараш пурынеда гын, кругым але камерым налза, уке гын шкеат туткарыш логалын кертыда.
Любовь Камалетдинова.
Авторын фотожо.
