6 июльышто Советский район Кукмарий ялыште икымше гана эртыше район кӱкшытан «Ӱяча» театрализоватлыме-модыш фестиваль калык йӱла дене кылдалтше кугу пайремыш савырнен.
Пӱртӱс лоҥгаште келыштарыме мотор сцене гоч погынышо калык дене эн ончычак Кундыш Кугыза ден Чачавий уныкаже саламлалтыныт. Но шуко унам ужмеке, ӱдыр, ӧрмалген, кочаж деч йодеш: «Тынар шуко еҥжым мо дене пукшена? Мелнам лугалташ ложашнат ок сите…» Тидым колын, тудлан пайрем персонаж-влак Шӱшпык, Маска, Пырыс, Васли шольо, Микал чӱчӱ да молат полшаш лектыт да пырля изи гына руаш чуҥгам ыштат. Но тудыжо тугай изи – ик гана пурлаш вел сита. А Кундыш Кугыза манеш: «Кинде падырашым пуымылан Юмылан, Мланде авалан тау! Котомкаш пыште, ю шӱлышым пуртена». Мо шонеда, изи ӱячат кугемеш да чылаштлан пурлаш ситыше лиеш! Тудын дене калыкым сийлыме годым Кундыш Кугыза ойла: «Марий калык, шочмо мландыдам аралыза, тыршен пашам ыштыза, кажне ешыште ӱяча пайрем чес лийже. Пален шогыза, шарнен илыза, кушкын толшо тукымым туныктен толза: ӱячан шочмо верже – Кукмарий кундем».
Тидын деч вара фестивальым торжественно почмаш эртен. Тушко Марий Эл Кугыжаныш Погын председательын алмаштышыже, СВО-н ветеранже Александр Смирнов, республикын тазалык аралтыш министрже Владимир Гладнев, Советский муниципальный районым вуйлатыше Сергей Халтурин, Советский район администрацийым вуйлатыше Евгений Пушкин лийыныт.
– Таче тендан – дебют. Тудо ончыкыжым марий калыкын тӱвыра поянлыкшым арален толшо сай йӱлашке савырна, шонем. Идалык наре ончыч Кукмарийыште илыше чолга еҥ-влак дене верысе тӱвыра пӧртыштӧ вашлийынна да тыгай фестивальым эртарыме нерген мутланенна. Тиде шонымаш илышыш пурталтын, – каласен министр Владимир Гладнев.
Советский централизоватлыме клуб системын директоржо Татьяна Басован мутшо почеш, тыгай фестивальым эртараш темлымашым Советский районлан вуйын шогышо-влак Сергей Халтурин ден Евгений Пушкин ыштеныт.
– А ме, клуб пашаеҥ-влак, Кукмарий ялын старостыжо да чолга еҥже, верысе предприниматель ден депутат-шамыч ты шонымашым илышыш пурташ тыршенна да тидым ыштен кертынна. Фестиваль моткоч оҥайын эртен, мемнам иквереш чумырен. Марий калыкнан кочкышыжым – ӱячам – кӱэштме мастарлыкым 12 ӱстелыште палдареныт, кидмастар-влак моштымашыштым ончыктеныт. Кумшо номинаций модыш программым ончыктымаш лийын, тушко тӱвыра пашаеҥ-влак верысе калыкышт дене пырля ушненыт да моткоч оҥай модыш-шамыч дене модыктеныт. Чыла тидын деч посна фестиваль кышкарыште эр гыч кас марте ветеран-влак коклаште мини-футбол дене Йӱдвел-Эрвел первенствын таҥасымашыже эртен. Мучашлан концерт лийын, а вара чыла унам лашка шӱр, шыдаҥ пучымыш да тутло шудо чай дене сийленна, – каласыш Татьяна Вячеславовна.
Тудо ешарыш: «Ӱяча» фестивальым умбакыже эртараш шонымаш уло.
Галина Кожевникова
Фотом Советский район Кукмарий, Кужмарий тувыра пӧрт-влакын соцкылысе лаштыклашт гыч налме
