Марий Эл вуйлатышын пашажым жаплан шуктышо Юрий Зайцев Марий Элыште Общероссийский калык фронтын активше дене вашлийын.
ОНФ-ын регионысо исполком вуйлатышыже Надежда Ефремова деке мутым савырышыжла тудо каласен: «Мый уло кумыл дене таче Тендан дене вашлиям. Элна Украиныште спецоперацийым наҥгайыме жапыште Общероссийский калык фронтын увертарыме «Чылажат Сеҥымаш лӱмеш» проектше пеш кӱлешан. Нацизм ден фашизмлан уэш ылыжаш эрыкым пуыман огыл, сандене кеч-могай сай у тӱҥалтыш шергакан».
Исполком вуйлатыше Общероссийский калык фронтын тӱҥ задачыже-влакым ушештарен. «Марий Элыште ОНФ толкын Россий президент Владимир Путинын кӱштыкшӧ почеш 2011 ийыште вийым налын. ОНФ радамыштына 500 утла активист шотлалтеш», – каласен тудо.
Надежда Ефремован мутшо почеш, кугарнян Донецк республикыш кокымшо груз кая. Ты проектыш региональный штабын членже, пашаче предприятий да чоҥышо фирме вуйлатыше, ура чонан тыглай еҥ-влак шукын ушненыт. Юрий Зайцев умбакыжат чолгалыкым ончыкташ, граждан-влакым тургыжландарыше йодыш-влакым эреак эскераш да нуным кораҥдымаште полшен шогаш темлен.
Л.СЕМЕНОВА
Д.РЕЧКИНЫН фотожо
