Кеҥеж канышым кажныже шке семынже эртараш тырша. Тыгодым иктышт тӱрлӧ кундемыш миен толаш, теҥыз воктене канаш кумылан улыт, а южыштлан шочмо кундемыште еш, родо-тукым да йолташ-влак дене пырля лияш келша.
Йолташ-влак, те кеҥежым, каныш жапдам кушто эртарышда але эртареда? Мо дене тиде кундем тыланда келша?
Наталья ЯМАЕВА, «Марий Эл» ГТРК-н тематический вещаний группын шеф-редакторжо:
– Тений кеҥеж мучко пашам ыштенам, отпускем 2 сентябрьыште веле тӱҥалын. А яра жапыште, каныш кечылаште шочмо кундемышкем, Марий Турек район Аимке ялышкем, кудалыштынна. Тушто паша пеш шуко, чылажымат жапыштыже ыштен шуктыман. Емыж кӱын шумеке, олыкыш снегым я мӧрым, чодырашке эҥыжым погаш миенна. «Сурт-пече» газетыште куэ выньыкым могай жапыште тодышташ шотлан толмо нерген статьям лудмеке, выньыкым ямдыленна. Вара чодыра поҥгылан поян лие, тушкат миен толынна. Тылеч посна сад-пакчаже, сурт кӧргӧ сомылкаже… Шижынат ышна шукто, пакчасаскам шинчалташ, мариноватлаш, салатым ямдылашат жап толын шуын.
Кеҥеж мучаште, 29 август гыч 1 сентябрь марте паша дене командировкыш Дагестан кундемыш самолёт ден чоҥешташ логале. Пеленем Аня ӱдырем нальым. Тушто Россий кӱкшытан «Голос Евразии» национальный вещаний фестивальым иктешленыт. Самырык музыкант Иван Каменщиков дене пырля ямдылыме «Чоным чоҥымо семӱзгар-влак» фильмна «Эн сай оператор паша» номинацийыште сеҥышыш лектын. Организатор-влак пеш поян тӱвыра программым ямдыленыт: верысе калыкын тӱвыраже, йӱлаж дене палдареныт, Дагестан кундемын сылне верлажым ончыктен коштыктеныт. Мутат уке, Каспий теҥызыште йӱштылынна да верысе национальный сийым шер темммешке кочкынна. Тысе калык, чынжымак, унам вашлийын да ончен мошта. Сандене тиде командировко кужу жаплан шарнымашеш кодеш. Икманаш, тенийысе кеҥеж моткоч пайдалын эртен.
Виктория МАМАЕВА, Марий Эл радион вӱдышыжӧ:
– Кеҥежын эртен кайымыжым шижынам шым шукто. Июньышто дипломым аралышым, выпускной бална эртыш, садлан каныме нерген шоналташат жап лийын огыл. Кеҥеж гоч манме гаяк пашам ыштенам, но тидын годымак ялышкемат миен толаш жапым муынам. Мӧҥгыштӧ компотым, вареньым ышташ, кияр ден помидорым шинчалташ полшенам. Тукым шӱжарем-шамыч дене жапым эртаренам. Чаманен каласем, тений ала-куш тораш огыл, чылт ялем воктенысе плотинашкат йӱштылаш миен шуын омыл. Вес кеҥежым шкалан утларак жапым ойыраш да кӱлеш семын каналташ шонем.
Чумыр кеҥежым ончалаш гын, тений тудо ятыр куанле уверлан да пиалан татлан поян лийын.
Андрей КОШАЕВ, кидмастар (Волжский район):
– Кеҥежым пӱжалтын пашам ыштет гын, телым илен лекташ куштылгырак, маныт. Мыят тидым шотыш налын, кеҥеж мучко пашам ыштенам. А кеҥежым тудыжо сурт коклаштат, пӱртӱс лоҥгаштат ятырак. Мутлан, шканнат да ужалашат пуым ямдылыме, выньыкым кучымо.
Канаш шыжым тӱҥалам.
Линда ПЕЧНИКОВА, Э.Сапаев лӱмеш опер да балет академический театрын артистше, балерине:
– Отпуск жапыште ик арня Санкт-Петербургышто лийынам. Тиде ола да тудын воктенысе пӱртӱс шке историйже, дене ойыртемалтеш, моторлыкшо, усталык шӱлышан улмыж дене кумылым савыра. Садлан тушто арня веле огыл, тылзе дене лияшат уто огыл. Гатчинский, Екатерининский полатла да нунын воктенысе парклаште моткоч келшен, Нева эҥер денат пеш сӧрал. Молан лачшымак нине верлаште лийынам? Мылам XVIII курымысо историй келша, садлан тудо пагытысе мотор оралтым ончен савырненам, эҥерысе толкыным ончен, чонем лыпландаренам, кумылем нӧлтенам.
Вес гана йӧратыме олаштем кужунракак лиям манын шонем.
А.БАЙКОВА ямдылен
Фотом еш альбом гыч налме
