«Юлым тазаҥдымаш» федеральный проектын «Экологий» национальный проектшым илышыш пуртымо кышкарыште тений кеҥежым Параньга посёлкышто канализацийын эрыктыме сооруженийжым уэмден олмыктен шуктат.
25 апрельыште Марий Эл правительстве председательын алмаштышыже Александр Сальников республикым вуйлатыше Юрий Зайцевлан тиде эрыктыме сооруженийым уэмден олмыктымо да «Юлым тазаҥдымаш» проектым илышыш пуртымо паша нерген каласкален.
Параньга посёлкышто рӱдераҥдыме канализаций дене оборудоватлыме шуко пачеран да шке чоҥымо 56 пӧрт верланен. Тылеч посна тыште кыдалаш ден сымыктыш школ-влак, йочасад, районысо больнице, тӱвыра рӱдер, библиотеке, соцаралымаш да моло административный зданий улыт.
Объект дене кылдалтше паша палемдыме радам деч ончыч шукталтеш да таче кечылан 60 процентлан ямде.
А.Сальниковын мутшо почеш, Марий Эл «Юлым тазаҥдымаш» федеральный проектым илышыш пуртымо шотышто моло регион коклаште ик эн ончылно кая. 2023 ийыште канализацийын эрыктыме сооруженийжым республикнан ныл объектыштыже: Параньга районышто, Йошкар-Олаште, Килемар посёлкышто да Марий Турек районысо Косолоп селаште – чоҥат да уэмден олмыктат. Чоҥымо да монтаж пашалан ойпидышым ыштыме. Тидлан 290 миллион утла теҥгем ойыраш палемдыме.
– Эрыктыме сооружений-влак коммунал инфраструктурын кӱлешан объектыштлан шотлалтыт. Проектын кышкарыштыже кугу оксам ойырымо, сандене чыла мероприятийым жапыштыже шукташ кӱлеш, – палемден Ю.Зайцев.
Марий Эл Республикым вуйлатышын администрацийжын информаций пӧлкажын уверже негызеш М.ИВАНОВА ямдылен
