Россий парламентаризм кечын Санкт-Петербургысо Таврический дворцыште РФ Законодатель-влак советын мероприятийже-влак эртеныт. Тушто Марий Эл Кугыжаныш Погын председатель Михаил Васютин лийын.
Законодатель-влак советын президиумжын заседанийжым Кугыжаныш Думо председательын алмаштышыже Ирина Яровая ден Федераций Совет председательын алмаштышыже Андрей Яцкин эртареныт. Ончымо йодыш-влак тений кеҥежым тазалыкым пеҥгыдемдыме кампанийлан ямдылалтме, икшыван еш-влакын канышыштым организовталыме да медицине полышын качествыже дене кылдалтыныт.
Палдарыме почеш, 2025 ийыште Россий мучко 40,5 тӱжем лагерь пашам ышта. Тушто 6 миллион наре тунемше каналтышаш.
Калыклан медицине полышым пуымо нерген йодышым каҥашыме годым палемденыт: кызытсе жаплан Кугыжаныш Думышто тидын дене кылдалтше 20 утла закон ончымаште.
Йоча медициным вияҥдыме нергенат мутланеныт.
Президиумын заседанийже нерген иктешлен ойлымыж годым Михаил Васютин каҥашыме йодыш-влакын тачысе кечылан кӱлешан улмыштым палемден. Тыгак йоча-влакын канышыштым организоватлыме да тазалыкыштым пеҥгыдемдыме сферыште комплексный правовой регулирований нерген федеральный законым ямдылыме нерген пунчалым луктыныт.
* * *
Тиде кечынак Михаил Васютин Россий законодатель-влак советын тӱнямбал вашкыл нелылык-влак шотышто комиссийын заседанийжын пашашкыже ушнен.
Тудым Татарстанын Кугыжаныш Советшын председательже Фарид Мухаметшин эртарен.
Комиссийын еҥже-влак регион-влакын йотэлласе партнер-влак дене вашкылым, тидын годымак спортым вияҥдыме йодыш-влак шотыштат, саемдышашлан шуктышаш паша нерген мутланеныт.
* * *
Михаил Васютин Ленинград областьысе Законодательный собраний председатель Сергей Бебенин дене вашлийын.
Нуно законодательный орган, парламент-влакын органлаштын пашашт, регионлаштышт туризмым да экономикым вияҥдыме йодышла нерген мутланеныт.
Кугыжаныш Погын председатель республикыште IT-компаний-влакын вияҥмыштым палемден.
Михаил Васютин ден Сергей Бебенин тӱвыра дене кылдалтше вашкылым умбакыжат шуйышаш нерген мутланен келшеныт.
40 еҥ лиеш
Кодшо кечылаште Марий Элын VI созыв Молодежный парламентыш кандидат-влакым ойырымо шотышто конкурсный комиссийын заседанийже-влак эртеныт.
У радам дене келшышын, парламентыш 40 еҥ пура: 17 – муниципал молодежный парламентла гыч, 13 – Кугыжаныш Погынышто улшо политический партийла деч, 10 – конкурс гоч эртыше-влак.
Ты гана конкурсыш 20 йодмашым пуэныт. Кандидат-влакым посна критерийла почеш акленыт. Кӧ мыняр баллым погымо иктешлымаш почеш рейтинг ышталтын.
Тений икымше гана интернетыште кандидат-влак верч почылтшо йӱклымашын иктешлымашыжым шотыш налыныт.
Конкурсышто сеҥышылан рейтингыште икымше гыч луымшо вер марте улшо-влак палемдалтыныт. Тиде – Мусаниф Моллачиев, Никита Крюков, Ксения Тряпкина, Даниил Петровский, Юлия Петухова, Анастасия Антакова, Алексей Кудрявцев, Елена Глазырина, Мария Роженцова, Ксения Якунина. Моло кандидат-влак Молодежный парламентын резервышкыже пурталтыныт.
Любовь Камалетдинова
