Тыге лектын: мый эн ончычак тиде кидмастарын, У Торъял поселкысо школышто технологий предметым туныктышо Александр Анатольевич Мачульскийын, пу гыч пӱчкедыме кидпашаже-влакым, рашрак каласаш гын, фотографийыштым соцкыллаште ужынам. Вара веле шкеж дене палыме лийынам.
Шкеат ужыда, ойыртемалтше улмышт снимкыла гычак коеш. Поснак пӧрт, сурт-оралте, черке да нунын кумдыкыштым моткочак сылнын келыштарыме. Нуным изи ужаш-влак гыч ыштыме. Тыге гын, тидлан кужун шинчылташ кӱлын докан. А чытышыже мыняр лийшаш? Санденак чылажымат шке шинча денак ужмо шуын. Тыге ик кечын У Торъял посёлкыш командировкыш мийымеке, кидмастар дене палыме лияш манын, школыш пурышна.
Пиалешем, лачак кужу перемене ыле, да кидмастар дене кужунак мутланаш, школ мастерскойын ик пӧлемышкыже шкенжын, тыгак тудын вуйлатымыж почеш тунемше-влакын тӱрлӧ ийлаште ыштыме ойыртемалтше пашаштымат тыгеат-тугеат шымлен ончаш да фотографироватлаш йӧнем лие.
Мутланыме годым шижалте: туныктышо шке пашажым моткоч йӧрата. Тиде хоббиже, чон сомылжо манашат келшен толеш. А кунам кеч-момат кугу кумыл дене шуктет, тунам лектышыжат шкендым веле огыл, молымат куандара.
Тидыже эше весе гычат шижалте: Александр Анатольевич мастерскойысо пӧлемыште улшо кажне паша, тудым кӧ ыштыме, рвезе-влакын кызыт кушто улмышт, мом тунем пытарымышт нерген каласкалыш. Южыштын пашаштым гын фотографироватлыме да папкылашке чумырымо. Туныктышо нунымат лукто да кажныж гаяк нерген кумылын радамлыш.
– Теве тиде – пӧрт-лампе. Адакшым тудо пӧрдеш, – каласыш Александр Анатольевич да чӱктенак ончыктыш. Моткоч оҥай!
Такшым тыште кажныжым тӱсле-ен ончыде, а вара мокталтыде нигузе от чыте. Южыштым гын налашат кумылаҥыт. Теве ик пайрем годым эртаралтше выставкыш кокла кугытан мӱй вочкым ончыкташ луктыныт улмаш. Тудым ик чиновник ужынат, моткоч келшен, да тунамак шканже налын каен.
Але, мутлан, вес гана тыге лийын. Кидмастарлан ик оласе черкын фотографийже келшен, да тудым чертитлен. Вара тиде чертёж почеш тунемше-шамыч дене пырля черкымыштеныт. Ик семинарыште тудым юмынъеҥ-влак ужыныт да ужалаш йодыныт. Но кидмастар тореш лийын, молан манаш гын ончыкыжым тоштерым чумыраш шона…
Александр Анатольевич школышто ойыртемалтше, оҥай пашам веле огыл, тыгак программе дене келшышын мӧҥгыштӧ, сурт коклаште, сад-пакчаште пайдаланаш кӱлешан арверым, ӱзгарым да мебельымат ышташ туныкта. Теве школыш мыйын мийымем годым коррекционный классыште тунемше-влак теҥгылыш савырныше олымбал ден ӱстелым ыштат ыле. Чынжымак, арвержат, тыгайым ыштен моштымо мастарлыкыштат ончыкыжым илышыштышт кӱлеш лиеш. А южо тунемшыже, илен-толын, ала туныктышыж гаяк уста кидмастар лиеш, кӧ пала…
Любовь Камалетдинова
Авторын фотожо
