СОЦИАЛ ИЛЫШ

Кажныжлан ешарен тӱлат

Ийготыш шудымо але студент икшыван пенсионер ача-ава-влакын кугурак пенсийлан правашт уло. Тыгодым студент очный формо дене тунемшаш да 23 ий деч кугу лийшаш огыл. А 18 ияш марте йочан пенсионер ача-ава-шамычлан кугемдыме выплате икшывын тунеммыж деч поснат палемдалтеш.

Тиде выплате шоҥгылык але инвалидность шотышто страховой пенсийыш палемдалтеш. Тыгодым ешын пашам ыштыдыме кум еҥже марте шотыш налалтеш.

2021 ийыште пенсионер-шамычлан ешын пашам ыштыдыме кажне еҥжылан 2014,83 теҥге дене ешарен тӱлат. Тиде суммо пеҥгыдемдыме выплатым индексироватлыме дене пырля ий еда кугемеш.

Кугемдыме выплатым налшашлан ача-ава-влак Россий Пенсий фондын верысе органышкыже йодмашым, йоча шочмо нерген свидетельствым, икшывын 18 ийым темымыж деч вара иждивений фактым пеҥгыдемдыше документым да шинчымашым пуымо организацийын очный формо дене тунемме нерген справкыжым кондыман.

Студентым шинчымашым пуымо заведений гыч луктын колтымо але тудын тунемме вес формыш куснымыж годым кугемдыме выплатылан права йомеш. Оксам закондымын налме деч тыгай шотан фактым Пенсий фондыш вич кече жапыште увертарыман.

У тунемме ий тӱҥалме пагытлан Марий Элыште кугемдыме выплатым 4,5 тӱжем пенсионер ача-авалан палемдыме.

 М.ИВАНОВА

 

Опубликовать в Одноклассники

Добавить комментарий