УВЕР ЙОГЫН

Кажнынан шонымаш икте  – чоҥештышын корныжо пиалан лийже

Тачысе лаштыкын унаже — чолга марий ӱдыр Эльза АЛЕКСАНДРОВА. Тудо Йошкар-Олаште шочын-кушкын. Верысе 14-ше №-ан гимназийым шӧртньӧ медаль дене тунем пытарен. Санкт-Петербург олаште Граждан авиаций университетыште «Аэропорт пашан организацийже» специальностьым налын.  Кызыт Г.М.Тукай лӱмеш Казаньысе Международный аэропортышто диспетчерлан тырша.

– Эльза, тый Йошкар-Ола гыч улат. Руш-влак коклаште кушкынат гынат, марий йылмым пеш сайын палет.

Йоча годсек мӧҥгыштӧ марла мутланенна, тӱрлӧ мероприятийыш коштынна. Школышто йылмым палаш туныктышем-влак кумылаҥден шогеныт. Мурымашке, куштымашке эреак ушнаш йодыныт. Классыштем икмыняр ӱдыр-рвезе руш улыт ыле гынат, марий йылме ок кӱл манын, нигунам ойлен огытыл. Садлан, шочмо йылмым тунемаш огыл гынат лиеш манме шонымаш ушыш пуренат огыл.

Кызытат мый марий газетым лудам, муро-влакым колыштам, южгунам радиом чӱктем. Кид лывырге лийже манын, келшыше статьям кагазеш возем.

 – Санкт-Петербург оласе Граждан авиаций университетыш кузе логалынат?

Вес олаште тунемаш да пашам ышташ кумылем лийын. Марий Эл унала толаш да чон дене канаш келшыше вер лийже манын шоненам. Документым Екатеринбургысо, Челябинскысе, Санкт-Петербургысо да Йошкар-Оласе кок вузлашке колтенам ыле. Челябинскыште ойырен налме специальность почеш бюджет вер уке улмаш, Екатеринбург гыч вашмут толын огыл. Пиалешем Санкт-Петербург гыч йыҥгыртеныт да тунемаш ӱжыныт.

        Профессием ача-авамын (Эльзан ачаже – оньыжа Эдуард Васольевич Александров, аваже – Марий самырык театрын озанлык пӧлкажын вуйлатышыже Елена Семеновна Александрова – авт.)  пашашт деч ойыртемалтше лийже манын шоненам. Тидак ты специальностьым ойырен налаш тӱҥ амал лийын. Адакшым авамат шке жапыштыже шочмо кундем деч тораште тунем лектын, мыйынат тыгак ыштыме шуын.

       Авиаций мылам йӧршын умылыдымо тӱня ыле. Шуко тунемаш, у аланым тӱҥалтыш гыч шымлаш логалын. Тидыже мылам поснак оҥайын чучын.

Тиде специальность мылам пеш келша. Шке корнем муынам манам гын, йоҥылыш ом лий. Тунемме программе пеш пайдале ыле. Шукыж годым занятийыште документ-влакым шымленна, а нуныжо англичан йылме дене возымо лийыныт. Йот йылме дене пашам ышташ мылам йӧсырак ыле. Вет тудым школышто веле тунемаш тӱҥалынам. Мыйын шонымаште йоча-влакым йылме дене изишт годымак палдарыман. Вет тидым модмо йӧреат ышташ лиеш.

Международный кӱкшытан аэропортышто йылмым палыде пашам ышташ изиш нелырак. Сандене кызыт мыйын у шонымаш – англичан йылмым сайынрак тунемаш.

– Казаньысе аэропортыш пашам ышташ кузе пуренат?

Ты аэропортышто икмыняр гана практикым эртенам. Ончыч ончен коштынам, тунемынам. Ик ий гыч икмыняр сомылымат ӱшан пуэныт. А диплом деч ончыч эртыме практике годым пашаш налыныт. Тунем пытарымеке, диспетчерлан ӱжыныт. Тыге ынде пел ий наре ты сомылым шуктем.

Аэропорт – тиде шкешотан организм. Тудын «шӱмыштыжӧ» диспетчер-влак тыршат. Нуно мо лийшашым шижын моштышаш, паша планым чын чоҥышаш улыт. Еҥ-влак дене вашкылышт пеҥгыде лийшаш. Вет нунын умылен да умылтарен моштымышт ты пашаште тӱҥ.

Мемнан сомылна шинчалан койдымо. Но кажнынан шонымаш икте – пассажирнан корныжо пиалан лийже.

Кеч-могай пашамат йӧратен ыштыман. Тыге веле шонымо кӱкшытыш шуаш лиеш. Профессийыште чон почын тыршет гын, илашат куштылгырак.

– Тунеммет годым тый тыгак студент совет ушемын еҥже лийынат.

Тыге. Ончыч мый шуко гана тӱрлӧ слётыш, форумыш коштынам. Чыла тиде арам ынже лий манын, чолга студент-влак радамыш ушненам.

Университетыште ӱдыр-рвезе-влак дене пырля шагал огыл мероприятийым эртарыме, проектым возымо. Шарнымашеш «Йӱд-квест» вашлиймаш кодын. Тушто мом да кузе ышташ арня мучко шонен коштынам. А эртарен колтымеке, йолташем-влакат, участник-шамычат моткоч келшен манын палемденыт.

Ты жапыштак «Проект академий» кум тылзаш курсым тунем лектынам. Тиде шинчымашым кызытсе илышыште пеш кӱлешанлан шотлем.

Студсовет ятыр жапым налын гынат, тушко ушнымемлан ом ӧпкеле, вет тиде мыйым шукылан туныктен, кугу опытым пуэн.

– Чолга лиймашке корным почшо мероприятий семын Марий самырык тукым слётым палемдышыч…

Тиде чын. Ты погынымашке кажне марий активист ушнышаш, шонем.  Вет тушто уш-акылым вияҥдаш, проектым возен ончаш да илышыш шыҥдараш, икоян йолташ-влакым муаш лиеш.

Икымше гана слётыш мый, латныл ияш ӱдыр, ачам дене пырля логалынам. Участник-влакын пашаштым ужмеке, нунын радамыш ушнаш кумылаҥынам. Шонымашем вашке шукталте. А 2017 ийыште лужавуй лияш ӱшанышт. Тунам мый латкандаш ияш лийынам. Лужаште мый дечем кугурак-влак ятырын ыльыч. Садлан пеш тургыжланенам. Мутем колышташ огыт тӱҥал манын лӱдынам. Но ӱдыр-рвезе-влак пеш поро кумылан лийыныт. Ой-каҥашышт  дене ты сомылым шукташ полшеныт. 2020 ийыште адакат лужавуй лийынам. Ты гана шкемым ӱшанлын кученам.

– У ий дене, Эльза! Ончыкылык корнет волгыдо лийже.

– Тау!

 

О.МОШКИНА мутланен

Опубликовать в Одноклассники

Добавить комментарий