Волжскышто корным олмыкташ, а Йошкар-Олаште чарналтыш павильоным шогалташ да йоча площадкым ышташ
Марий Эл вуйлатыше Юрий Зайцев тидын нерген 5 июньышто гражадан-влаклан приёмым эртарымыж годым ойлен.
Йошкар-Оласе Киров уремыште йолешке-влаклан йӧнештарыме верла пытартыш жапыште койынак вашталтыныт, вашке тротуарым олмыктен пытарат, но 3-шо №-ан пӧрт ваштареш улшо чарналтыште нимогай леведыш уке. Йӱр да шокшо кече деч нигуш шылаш. Олаште илыше Лариса Романова тӱшка транспортым вучымо ты остановкышто павильоным ышташ йодмаш дене лектын.
Киров уремыште машина йогын кугу, еҥ-влак пашашке шукынжо общественный транспорт дене кудалыштыт, сандене чарналтышыште павильоным шогалтыман, палемден Марий Эл вуйлатыше.
А теве Галина Рубцова Прохоров уремысе 34 «А» №-ан шуко пачеран пӧрт воктене йоча площадкым почаш йодмаш дене толын. Икшыве-влакын каникулышт тӱҥалын, а модашышт да каналташышт келыштарыме нимогай кумдык уке, тургыжланен ойлен тудо.
Калык шуко илыман микрорайонышто йоча площадке деч посна ок лий, поснак кеҥежым, палемден регион вуйлатыше да Йошкар-Олан мэрже Евгений Масловлан ты йодышым лишыл жапыште решатлаш кӱштен
Волжскысо 1-ше №-ан «Одуванчик» йочасадым вуйлатыше Ю.Зайцевлан оласе калыклан эре полшен шогымыжлан тауштен каласен да Ленин уремын начар улмыжым шотыш налаш йодын. Мутшо почеш, корным ачалаш республикысе бюджет гыч 9 миллион теҥгем ойырымо, но чумыр пашам шукташ тиде ок сите.
Юрий Зайцевын мутшо почеш, ты проблеме тудлан палыме, шкежат олаште лиймыж годым локтылалтше корным, Ленин уремысымат, тӧрлаш кӱлмым ужын, сандене йодмаш шукталтеш манын ӱшандарен.
Республикын транспорт да корно озанлык министрже Александр Герасименко умылтарен: республикысе корно фонд гыч ешартыш шийвундым ойырымеке, подрядчикым ойырымо шотышто торгым эртарат. Олмыктымо пашам сентябрь мучашлан шукташ палемдыме.
«Таче йоҥгалтше кажне йодмаш республикыште илыше еҥ-влакын лӱдыкшыдымылыкышгт дене кылдалтын, а тидым ме, кучемын представительже-влак, шуктышаш улына. Сандене ыштышаш пашам шуйкалаш огыл манын йодам», – каласен Юрий Зайцев.
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо
