Марий Элым вуйлатыше Юрий Зайцевын эртарыме правительстве заседанийыште регионысо ешартыш образований системе нерген каҥашеныт.
Кызыт республикыштына ача-ава-влаклан «Йоча-влакын ешартыш образований навигаторжо» автоматизироватлыме увер системе пашам ышта. Тудын полшымо дене икшывылан келшыше программыш муаш да тушко онлайн йӧн дене возалташ лиеш.
Тиде платформышто 100 тӱжем утла еҥым, 542 организацийым регистрироватлыме. Эртыше тунемме идалыкыште 4320 программым илышыш пуртымо.
Марий Элыште кызытлан ешартыш образований системе 5-18 ияш 80 тӱжем утла икшывым авалтен, республикыште илыше чыла йоча гыч тидыже 71 процент.
Заседанийыште республикым вуйлатыше тиде показательым 80 процент марте кугемдаш кӱлмым палемден. Тидын деч посна ешартыш образованийым пуышо тӧнеж, спортклуб да медиарӱдер-влакын материально-технический базыштым вияҥдаш задачым шынден.
«Кружок ден секцийлаште моштымашым вияҥдаш шукырак йоча-влаклан йӧн лийшаш. Тиде нунылан личность семын кушкашышт да ончыкылык профессионал корным ойырымышт годым моткоч кӱлеш», – каласен Марий Элым вуйлатыше.
Марий Элым вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
