Сентябрьын кумшо рушарнянже мемнан элыште Чодыра озанлык пашаеҥ-влакын профессионал пайремышт лиеш. Тений тудо 15 сентябьрлан логалеш да 45-ше гана кугыжаныш кӱкшытыштӧ палемдалтеш. Тудын вашеш кодшо кечылаште Куяр лесничествын Чернушкысо участкыштыже ты отрасльыште тыршыше-влакын профессионал мастарлыкыштым тергыме конкурс эртен.
Республикысе чодыра озанлык ведомство Пӱртӱс поянлык министерстве, Юл кундем кугыжаныш технологий университет, Марий Элысе чодыра отрасль пашаеҥ-влакын профсоюзышт да Чодыра дене пайдаланыше-влакын ушемышт дене пырля тыгай конкурсым кажне ийын гаяк эртарат. Ты сферыште, поснак районласе лесничествылаште ыштыше специалист-влак тудым вучат, тудлан ямдылалтыт. Санденак кажне ийын тушко ведомствын чыла подразделенийже ушна манаш лиеш, лесничестве-влак веле огыл, арендатор-шамычат. Тений 18 команде лийын.
Конкурс ныл йыжыҥ дене эртен. Участник-шамычлан чодыра пожарым шекланен шуктымаште, тудым йӧртымаште, пушеҥгым комбинироватлыме йӧн дене пӱчкедымаште, бензопила чепым вашталтыме моштымашым ончыкташышт логалын.
Чыла тергымашым эн сайын Куяр лесничествын командыже эртен да икымше верыш лектын. Кокымшо ден кумшо Юл кундем кугыжаныш технологий университетын тунемме-опытный лесхозшо ден Киллемар лесничестве лийыныт. А теве йыжыҥлаште Кокшайск лесничестве, «Оршанский Лес» ООО, ПГТУ-н тунемме опытный участкыже да Пригородный лесничестве ойыртемалтыныт. Сеҥыше-влаклалан республикын пӱртӱс поянлык, экологий да йырым-йырысе средам аралыме шотышто министр Константин Наговицын министерствын дипломжым кучыктен.
Светлана Носова
Снимкылаште: конкурсышто сеҥыше-влак.
Фотом министерствын соцкыл лштыкше гыч налме.
