Чарла кремльыш пурымеке, шинчашкем тудо вигак логале. Икте огыл, кокыт. Кугече арня лекме кечын Чарла кремльыште эртыше ярмиҥгаште тыгай сӱретым вашлийым. Пеш моторын сӧрастарыме муно воктеке шогалын, шарнашлан войзалтшыжат ятырын лийыныт.
Иисус Христосын ылыжмыжлан да тудын дене пырля порылыкын да волгыдылыкын осалым, колымашым сеҥымыжлан пӧлеклалтше ты мероприятий поро йӱлаш савырнен шуын. Кече мучко кремль гӱжлен. Тӱрлӧ оҥай конкурс, модыш, пайрем концерт эртеныт. Республикысе рушарня школ-влак икшыве-шамычын кидпашаштым ончыкташ да ужалаш конденыт. Ты гана акрет годсо кидмастарлыклан туныктымо мастер-класс-влак лийыныт: сӱретлаш, шун гыч ненчаш, кӱм тапташ, куаш туныктеныт. Ожно самырык-влакын модмо модыш дене модыктеныт. Икшыве-шамычлан тӱрлӧ модыш дене модмо лукым келыштареныт. Эсогыл кугече муным пӧрдыктеныт, тайыл гыч колтеныт… Самырык-влакым ожнысо йӱла дене палдарымаш мероприятий годым тӱҥ лийын манашат лийын..
Кремльыш пурымште кумылан-влак чаҥым кырен кертыныт. Шкем звонарь семын терген ончаш шонышыжо ситышын лийын.
Ярмиҥга кеч-могай саманыште калыкын илыш сӱретшым почын пуа: мо дене поян тудым ужалымашке луктеш, мо ок сите – пазарыштак налеш. Ялозанлык сатум тыштат ужаленыт: мӱйым, шӧр-торыкым… А ик ӱстембалне пу гыч пӱчкеден лукмо пистолетым, пычалым, тӱрлӧ кӱзым ужым. Чылт чынла койыт. Эше нунын дене лӱйкалашат лиеш, каласыш ужалышыже. Саман могай, модышнат тугай. Тыгай модышыжым саде пӧръеҥет йолташыже-влак дене пырля ышта улмаш.
Пытартыш жапыште шочшо кидпашам тӱҥалше-шамычын ыштыш- кучышыштымат ужаш йӧн лекте. Мутлан, искусственный ротанг, муш кандыра гыч тӱрлӧ арвер, сумка, модыш моткоч ойыртемалтше улыт. Духовный литературым, черкыште кучылтмо арверымат налаш лийын.
Чарла кремль, «Волжский путь» уэмдымаш клуб, Шукшан заставе шке программыштым ончыктеныт. Икманаш, ты кечын кремль кӧргыштӧ йокрокланаш жап лийын огыл.
Ярмингам почмашке Марий Эл правительстве председательын икымше алмаштышыже Михаил Вастин, Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов толыныт. Марий митрополит Иоанн дене пырля каваш кӧгӧрченымат колтеныт.
Йошкар-Ола да Марий епархийын эртарыме ярмиҥгашке республикысе Тӱвыра, савыктыш да калык-влакын пашашт шотышто министерствын полшымыж дене Руш тӱвыра рӱдер, оласе администраций ушненыт. Мероприятийыш толшо-влакым шылан пучымыш да чай дене сийленыт. Пайремым кас велеш кремль воктенысе чыла храмыште чаҥым кырен мучашленыт.
С.Носова
М.Скобелевын фотожо.
