Медведево районысо Купсола ялыште илыше ик оза-влакын сурт ончылнышт веле огыл пучо-влак шогат, левашыштат тугай кугу янлык уло улмаш. Леваш капкам почо гын, чылт ӧртем лектеш: ойлымыж семынак кугу да топката шордо шоген, но пу гыч ыштыме.
Пӧрт ончылсо кок шордыжым суртоза-влак Светлана ден Александр Усоловмыт икмыняр ий ончыч шогалтеныт. Тыгай сӱретшым Йошкар-Оласе «Чикаго» кафе воктене тыгайрак сӱретшым ужыныт. Вара вӱдуам руэн конден, кок пӱчын фигурыштым шке кид дене ыштен шогалтеныт. Кастене волгалтышт манын, гирлянде дене пӱтыреныт. Да ынде кечывалымжат нуным шекланыде от эрте.
А теве леваш йымалне шогышо шордыжын шке историйже. Александр Николаевичын кидше чылалан толеш. Кушто гына пашам ыштен огыл, могай гына технике дене пайдаланен огыл… Уста сварщик, плотник, слесарь да тулеч моло. 2005 ийыште тыште мланде участкым налмеке, шкак суртым, моло оралтым нӧлтен. Кӧргыштыжат, йырым-йыржат пелашыж дене пырля тӱзатеныт. Урем вел гыч суртшым ончалат гын, тале кидмстар улмыжым вигак умылет – савар ден капкажак мом шогат.
Но айста левашыште шогышо шордо деке пӧртылына. Эше пандемий деч ончычак ик еҥ тудын деке тыгай йодмаш дене лектын улмаш. Но тыге савыралын, заказчиклан шордо кӱлеш лийын огыл. Скульптурым мастар пу падыраш-влакым пӱчкеден, ушен ыштен. Эшежым тудо чынжымак илышыште латвич ияш шордо могай лийшаш, лач тугайымак ышташ тыршен. Сандене ыштыш-кучышын оратаже кӱкшӧ да кугу. Но эше тӱкыжым ыштен шуктымо огыл.
Кушко ынде тудым вераҥдаш шонеда манын йодмылан, оза утыжым ыш шонкале. Пропиткым, обработкым, тӱкым ыштен шуктымеке, мастар шордыжым ялыш пурымашке вераҥдаш шона.
Светлана Носова
М.Скобелевын фотожо.
