Михаил СКОБЕЛЕВ, Лидия ШАБДАРОВА
Каныш-пайдалын да оҥайын
Марий Элыште ынде ныл ий почела Марий Эл вуйлатышын темлымыж почеш «Марий кеҥеж» уремысе фестиваль эрта.
Тений тудо «Марий кеҥеж» – Икымше-влакын толкынышт дене пырля» маналтеш.
Фестиваль районлаштат эртаралтеш. Рӱдолаште тудо калыкым шке йырже Йошкар-Оласе Чавайн бульварыште, Патриарший площадьыште, Тӱвыра да каныме рӱдӧ ден Сеҥымаш парклаште чумыра.
Пытартыш каныш кечылаште мый ты фестивальын икмыняр мероприятийкыже миен коштым. Рӱдолаште илыше-влакын кеҥеж канышым кузе эртарымыштым шке шинчам денак ужым.
25 июльышто, кугарнян, кастене Чавайн лӱмеш бульвар дене эртыме годым семым кольым. Лишемымат, марий вургеман артист-влакын мурымыштым колышташ шогальым. Энелавийын муралтымыже чонышкемак логале. «Гармоний» творческий ушем дене пырля совет жапысе мурымат муралтышым. Куштышо мужыр Лидия ден Геннадий Моисеевмытын номерышт шукыштын кумылыштым нӧлтале. Эсогыл ик ӱдыр нунылан пеледышым кучыктыш.
Йошкар-Оласе Тӱвыра да каныме рӱдӧ паркын эстраде аланыштыжат сем йоҥген. Мылам гын Марат Гилязовын мурымыжо келшыш. Тудо 6-шо класс гычак вокал дене заниматла.
Шуматкече эрым спортлан пӧлеклаш шонен пыштышым. Тыге рӱдоласе Тӱвыра да каныме рӱдӧ паркыш кугу теннис кортыш корнем такыртышым. Тушто ты спорт дене республикын ныл гана чемпионжо Павел Ковалёв дене палыме лийым.
– Йошкар-Олаште кугу теннис дене иктаж 50 еҥ модеш. Ме икте-весым сайын палена, – каласыш спортсмен.
Паркын эстраде аланыштыже тренер Александра Сысуеван эртарыме «Бодрая Йошка» зарядкышке ушнышым. Утларакшым тушко ӱдырамаш-влак погыненыт ыле. Пӧръеҥже мый шкет лийынам. Пӱжалташ чотак вереште.
Чарла Кремльыште олан мэржын кубокшо верч шахмат дене блиц-турнир да писе шахмат дене таҥасымаш эртеныт. Модмашке верысе шахматист-шамыч да Киров область, Чуваший ден Хант-Манси гыч уна-влак ушненыт. Шахматист-шамыч коклаште Всеволод Овчинников ден Ярослава Яшинан модмыштым палемдынем. Кажныже моткоч писын сеҥышыш лектын.
Йошкар-Олан 400 ияш лӱмгечыжлан пӧлеклалтше паркыште пляжный волейбол дене таҥасымашкат миен шуынам. Изи Какшан эҥерыште сап, катамаран, пуш дене ийын коштшо-влакым эскерышым.
Ты кечын бульварыште кидмастар-влакын ярмиҥгашт пашам ыштен. Тушто шкалан келшыше тӱрлӧ сӧрастарышым, сувенирым ойырен налаш йӧн лийын.
Кастене Патриарший площадьыш ошкыльым. Тушто Морко район Изнур тӱвыра пӧртын «Ӱшӱт сем» ансамбльже калыклан концертым ончыктен. Погынышо-влак весела сем почеш тавалтеныт, муралтеныт. Мый нуным куанен ончышым, фотош войзышым. Тыге каныш кече-влакым пайдалын да оҥайын эртарышым.
Авторын фотожо.
