Марий Йӱштӧ Кугызан у пӧртышкыжат газ толын шуын.
Кодшо кечылаште «Газпром газораспределение Йошкар-Ола» организацийын пашеҥже-влак Шернур район Кукнур кундемысе Йӱштӧ Кугызан илемжым газ пучыш ушеныт.
А тидлан ончыч изи давлениян 88 метр пучым шупшашышт, ырыктыме котёлым монтироватлашышт логалын. Илемысе чыла оралте ынде пӱртус газ дене ырыкталтеш. Тений чоҥен шуктымо Йӱштӧ Кугызан кок пачашан у пӧртыштыжат оза-шамычлан кеч мастар-классым, тоштер мучко экскурсийым эртараш йонан лиеш. Уна-влакым сийлаш чесымат ямдылыме пашат куштылемеш.
Турист тӱшка-влак нерген ойылыманат огыл. Поснак теле пагытыште, Йӱштӧ Кугыза да Лумӱдыр дене вашлийме деч ончыч «Йомак тӱням» ончал савырнымеке, курык гыч мунчалтымеке, шокшо пӧртыштӧ ырен лекташ лиеш. Ончыктен кодыман, сезонлан илемыште вич тӱжем наре унам вашлийын ужатат.
С.Носова
