Марий Элыште 2024 ийысе тазалыкым пеҥгыдемдыме кампанийыште тений 65 тӱжем наре самырык еҥлан канаш да жапым пайдалын эртараш йӧным ышташ палемдыме.
Тиде йодышым Россий Федераций правительстве председательын алмаштышыже Дмитрий Чернышенкон вуйлатымыж почеш видеоконференций йӧн дене эртаралтше совещанийыште каҥашеныт.
Тений каныме да тазалыкым пеҥгыдемдыме йоча организаций-влакын реестрышкыже Марий Элысе 205 тыгай верым пуртымо. Кызытлан республикыште ола деч ӧрдыжтӧ верланыше 15 стационар да палаткан кок лагерьыште чумыр налмаште 2,9 тӱжем икшыве кана. Эше вич тыгай организаций шке омсажым график дене келшышын почеш.
Школ пеленысе чыла лагерь пашам мучашлен, тыгай йӧн тений дене 12 тӱжем наре йоча канен. Тидын деч посна июньышто 26 тӱжем утла икшывылан кудывечысе площадке, школ лесничестве пашам ыштеныт, нунылан тӱрлӧ акцийым эртареныт, тыгак йоча-влакым походыш, экспедицийыш коштыктеныт.
Поснак кугу тӱткыш илышыште нелылыкыш логалше ӱдыр-рвезылан да специальный военный операцийын участникше-влакын шочшыштлан ойыралтеш. Тыгай радамыш пурталтше 4,7 тӱжем самырык еҥлан тазалыкым пеҥгыдемдаш да канаш путёвкым кучыктымо.
Тыгак республикыштына кеҥеж жапыште Запорожье областьысе Куйбышев район гыч 45 йочалан «Журавушка» социально-реабилитационный да «Авангард» военно-патриотический рӱдерлаште тазалыкым пеҥгыдемдаш йӧн ышталтеш.
Марий Эл Республикым вуйлатышын пресс-службыжын уверже негызеш Г.Кожевникова ямдылен
