Медведево кундемыште социальный могырым кӱлешан объект-влакым чоҥымо да уэмдыме паша кая
11 сентябрьыште Марий Элым вуйлатыше Юрий Зайцев Руэм посёлкышто верланыше йоча искусство школым ончен лектын. Кызыт тушто, «Тӱвыра» национальный проект почеш, уэмдыме паша ышталтеш. Тыгак ты кечын регионым вуйлатыше ты посёлкыштак 725 веран у общеобразовательный школым чоҥымаште лийын.
Искусство школ шотышто ойлаш гын, тушто кызыт ешартыш оралте чоҥалтеш. Тымарте тунемме верын кумдыкшо 268 квадратный метр лийын, а ончыкыжым тудо 765 квадратный метр марте кугемеш. Тыге тушто ончычсо семын тудо 150 тунемшылан гына огыл, ынде 330 йочалан шинчымашым пуаш йӧн лиеш. Республикын бюджетше гыч ойырымо 7 миллион теҥге дене тунемме верлан оборудований ден мебельым налаш палемдыме. Ешартыш оралтыште гардероб, актовый зал (тудо шуко функциян да 96 веран, тышеч кудытшо – коляске дене гына коштын кертше йоча-шамычлан), кок кугу класс лийыт. Вестибюль ден актовый залын коридоржо художественный произведений-влаклан выставкым ышташ йӧнештарыме. Школын омсажым кумдаҥдаш, пандусым вераҥдаш, тыгак пырдыжым, кӱварым да леведышым уэмдаш, хореографий залым шотыш кондаш палемдыме.
Марий Элым вуйлатышылан ӱшандарен ойленыт: ешартыш оралте тений 1 декабрь марте ямде лиеш.
Посёлкышто чоҥалтше ныл блокан у кыдалаш школын ик блокшо ышталтын. Кызыт чоҥышо-влак икымше пачашым нӧлтат.
Медведево кундемыште Юрий Зайцев тыгак Пӱкшерме ялысе клубышто лийын. Тушто пашам ыштыше усталык коллектив-шамыч чылаже 150 еҥым авалтат да Россий кӱкшытан тӱрлӧ конкурслаште призан верым сеҥен налыт. Но верысе калык клубым уэмден олмыктымым вуча.
Районышто лиймыж деч вара регионым вуйлатыше иктешлыше совещанийым эртарен да Пӱкшерме ялыште у тӱвыра пӧртым чоҥымо шотышто йодышым ончаш кӱлмым палемден. «Тиде клубышто кок ансамбль уло. Нуно сай результатым ончыктат, икымше верым сеҥен налыт, а усталыкым вияҥдаш йӧнышт уке», – каласен тудо.
Руэмысе йоча искусство да кыдалаш школ-влак шотышто ойлымыж годым Юрий Зайцев иктешлымашым ыштен: нине объектым чоҥымо да уэмдыме паша график почеш ышталтеш.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен
