Шернур районысо Нурсолаште, верысе калыкын тӱҥалтышыжлан полышым пуымо программылан эҥертен, шукерте огыл памашым тӱзатыме.
Нурсола памаш шукылан палыме. Лач тышечын Арчакнур эҥер тӱҥалтышым налеш да Нолькыш ушна. Лач тыште кодшо курымын шымлымше ийлаштыже самырык-влак кеҥежым мураш-кушташ погынымо леведышан кумда левашым тиде кундемлан эн ончыч ыштышт. Шарнем, эше изиэм годым тиде памашыш авам вургем шӱалташ коштеш ыле. Вургем шурымо кок варашке шӱалтышашым сакален, а мый велосипед рульыш кок могырыш кок ведра дене тич оптен наҥгаенам. Тунамат памаш гыч вӱд кызытсе семынак шыжалт йога ыле. Жап эртыме семын волакшымат икмыняр гана вашталтеныт, леведышан пурамат шынденыт. Варажым тыште йӱштылмӧ верым келыштарышт, оралтыжым поликарбонат дене леведыч да тудо мӱндыркӧ волгалтын шинчен.
Йырже печым икмыняр ий ончычак печеныт, пеледышым шындылыныт, волаш-кӱзаш кӱ тошкалтышым ыштеныт. Но печыже гына оҥа дене ыштыме улмаш, да тудо чот тоштемын. Ял калык тӱшка погынымаште тиде печым уэмдаш йодын. Шотлен луктыныт: шергын шуэш да верысе калыкын тӱҥалтышыжлан полышым пуымо программыш ушнаш темленыт. Тыге кодшо ийын конкурсышто тиде проект сеҥышыш лектын. Чумыр акше 549,3 тӱжем теҥгешке шуын. Ял калык да спонсор-влак кӱшеш 88 тӱжем теҥгем погымо. Подрядчикше индивидуальный предприниматель Юрий Савинцев лийын. Тӱзатыме годым ял калыкын темлыме ойжым шотыш налме, ынде тыште каналташат, йӱштылашат йӧнан. Чоҥышо-влак памашыш волымо-кӱзымӧ чапле тошкалтышым ыштеныт, йыр евроштакетник дене печым ыштеныт, мотор беседкым келыштареныт.
Тиде памашыште меат лийна, чынжымак сай вашталтыш лиймым ужна. Ялын старостыжо Владислав Кожевниковын мутшо почеш, чылажымат калыкын ойжо семынак шуктымо.
Вячеслав Смоленцев.
Снимкыште: тӱзатыме памаш кумдык.
Фотом Чылдемыр ял администрацийын воткыл лаштыкше гыч налме.
