Козьмодемьянскыште Я.Эшпай лӱмеш калык культур рӱдерыште вокально-инструментальный да рок группо-влакын «ЭтноСем» этнофестивальышт эртен.
Марий Элын творческий пашаеҥже-влакын ушемышт тений тудым эртараш посна проектым возен да Россий Президентын Культурный инициативе фондшын грантшым сеҥен налын. Палемдыман, тыгай фестиваль ончычат эртаралтын, но тенийысыже – шымше – регион-влак кокласе кӱкшытыштӧ эртен.
Чылаже сценыш 17 усталык коллектив лектын. Нуно Моско, Озаҥ, Йошкар-Ола, Волжск олала, тыгак Курыкмарий, Звенигово, Медведево, Морко, Оршанке, Советский районла гыч лийыныт. 100 наре участник погынен. Мероприятийын организаторжо-влак радамыште тыгак Республикысе калык усталык рӱдер лийын.
Группо-влак кумдан палыме, тыгак шке гыч возымо муро-шамычым йоҥгалтареныт. Южо калык мурылан кызытсе жаплан келшыше аранжировкым ыштыше-шамычат лийыныт.
Фестивальын участникше-влаклан усталык лабораторий пашам ыштен, Чыкма оласе тӱвыра да историй тоштер-комплексыш экскурсийышкат намиеныт.
Мероприятий вич шагат шуйнен гынат, чыланыштлан келшен. Соцкыллаште комментарий-влакат тидым пеҥгыдемдат. Эшежым фестиваль вияш трансляцийыште ончыкталтын. Организатор-влакын ойлымышт почеш, тудым 7 тӱжем утла еҥ ончен.
Программын условийже почеш ойыртемалтше-влакым кум номинацийыште палемденыт. Рок группо-влак коклаште Медведево район гыч «Пазл», вокально—инструментальный ансамбль-влак коклаште Озаҥ гыч «Инеш», этногруппо-влак коклаште «Аяр» ойыртемалтыныт. Фестивальын Гран-прижым Моско гыч «Мое» группо сеҥен.
С.Носова
Снимкыште: «ЭтноСем» фестивальын участникше-влак.
Фотом Курыкмарий районысо администрацийын тӱвыра пӧлкажын лаштыкше гыч налме.
