Лариса Яковлева РФ президент пеленысе Наций-влак кокласе кыл шотышто советын заседанийыштыже лийын.
Марий Эл Кугыжаныш Погын председательын икымше алмаштышыже, Российысе марий-влакын федеральный калыкле-тӱвыра автономийыштын советшым вуйлатыше, Российысе калык-влакын ассамблейыштын регионысо пӧлкажын председательже палемдыме заседанийыште советын йыжыҥъеҥже семын участвоватлен.
Кремльыште эртыше вашлиймаште Владимир Путин лийын.
Элнан президентше советын йыжыҥъеҥже-шамычлан калык-влак коклаште икойлыкым арален кодаш тыршыме пашаштлан тауштен, тыгак калык ден религий-шамыч коклаште тушманле койышым ылыжташ тӧчымӧ чыла татым жапыштыже кораҥдаш кӱлмым палемден.
«Россий деч ӧрдыжтӧ пуйто тӱнямбал организаций ден шояк калык рӱдер-влак шочыт, чынжым гын тиде мемнан ваштареш виктаралтше информаций сарын куралже. – палемден Владимир Путин. – Калык ден наций-влакын икойлыкыштым, шкенан поянлыкна ден негызнам аралаш – суверенитетнан эн кӱлешан да тӱҥ эҥертышыже».
Калыкын икоян улмыжым, иза-шольо семын келшымым кызыт специальный военный операцийыште мемнан талешкына, салтакна да офицерна-шамыч ончыктат. Нуно Россий верч кредалмашке пырля каят да тушто ик калык улмынам пеҥгыдемдат, ешарен президент.
Владимир Путин тыгак элысе кажне калыкын тӱвыражым, йӱлажым да йылмыжым арален кодымо йодышлан тӱткышым ойырен, тидым Российысе национальный политикын тӱҥ негызше семын аклен.
Президент национальный политикын стратегийже-влакым 2036 ий марте палемдыме нерген указын проектшым ямдылаш кӱштен. Вице-премьер Татьяна Голикова документын проектшым лишыл жапыште ончаш пуаш сӧрен.
Вашлиймаште Владимир Путин 2026 ийым Российысе калык-влакын икоян улмо идалыкышт семын увертараш темлыме дене келшен.
«Президент дене вашлийын мутланымаш калык-влак кокласе кыл аланыште шуктымо пашанан кугыжанышлан кӱлмыжым пеҥгыдемдыш. Элым вуйлатышын да коллегем-влакын темлымашышт ден ой-каҥашыштым национальный политикын стратегийжым угыч тӧрлатен ямдылыме годым, мутат уке, шотыш налыт. Тушто национальный политикым илышыш пуртымаште регион-влакын верышт ден ответственностьыштым кугемдымым кӱлешанлан шотлем», – заседаний нерген шке шонымашыжым каласен Лариса Яковлева.
Маргарита ИВАНОВА.
Марий Эл Кугыжаныш Погынын фотожо.
