Кум кече мучко, 7–9 августышто, Йошкар-Олан кечыжым палемдыме гутлаште, Чарла кремльыште регион-влак кокласе черетан книга пайрем гӱжлаш тӱҥалеш.
Тудо 7 августышто 13 шагатлан почылтеш. Почмаште Моско да Россий регионла гыч пагалыме уна-влак лийыт. Тиде кечынак кастене «Какшан сер ӱмбалне» авторлык муро да поэзий пайрем эрта. Элнан тӱрлӧ кундемлаж гыч толшо-влак гитар да гармонь почеш шке мурыштым мураш тӱҥалыт. Конкурсым «Кугарня » газет «Марий Эл» увер агентстве дене пырля эртара.
Тӱҥ приз – гитар! Касын лӱмын ӱжмӧ унаже – Италий гыч музыкант Карло Визинтини.
8 августышто мастер-класс да автограф сессий-влак эртаралтыт, модмо да сылнымут программе, лекций да викторине-влак толшо-влаклан оҥай лийыт. Кастене «Ме икоян улына» концерт йоҥгалтеш. Ончышо-влакым марий эстрадын мурызыжо-влак, фольклор да калык коллектив-влак куандарат.
9 августышто Йошкар-Ола нерген книга-влакым ончаш да ужалаш луктыт. Мастер-класс ден автограф-сессий-влак шуйнат. Кечывал деч вара книга пайремтӱчылтеш.
Посна палемдыман: Марий книга пайрем «Лудшо Россий. Российысе регионлаште книга фестиваль» проект почеш эртаралтеш, тудлан полышым Культур инициативе шотышто Президент фонд пуа.
А пайрем жапыште «Марий книга издательстве» савыктыш пӧрт ден С.Г.Чавайн лӱмеш Национальный библиотеке «Марий книга фестивальын эн сай книгаже» конкурсым увертареныт. Тушко ушнаш йодмашым 1 гыч 7 август марте пуыман. Сеҥыше-влаклан диплом ден шарнымашан пӧлекым кучыктат. Толза Чарла кремльыште эртаралтшаш книга пайремыш! Да шкетын огыл – ешда дене толаш тыршыза! Товатат кумылда дене нӧлталтын, чонда дене пойдаралтын каеда. А тидланже книгам налын каяш ида мондо.
