КИДМАСТАР

Кайык тӱшка сад-пакчам сылнештара

Кайык тӱшка сад-пакчам сылнештара

Тачысе лаштыкнан унаже – сулен налме канышыште улшо Надежда Леонидовна ден Александр Николаевич Астаховмыт. Нунын дене Йошкар-Ола воктенысе садыште вашлийына. Канышыште гынат,пӧръеҥ кызытат «Промальп» организацийште тырша. Яра жап годым «Коммунальникыште» улшо кок участкым куча. Мутланымашна лач иктыштыже лие. Туштыжо  шинчамлан эн ончычак  ик лукышто кӱртньӧ гыч ыштыме композиций  перныш.

«Эх, – шонем, – тыште могай  мастар кидан еҥ ила!».Чынак улмаш.  Вигак шижалте: Александр Николаевич – поро кумылан айдеме,шуко вере лийын,шуко ужын – икманаш,тул-вӱд вошт эртен. Кидпашаж шотышто тыгерак тӱҥале:

–Эн ончыч кайык-влакым левыктен таптенам. Нуныжым тиде композицийыш кажне ийын икыт гыч  ешарем. Ужыда, могай тӱшка погынен…

Тыгай кидпаша-шамычым  йолташ-влаклан пуэденам.  — Варажым шоналтышым: «Рӱдаҥше кӱртньым да моло тыгай ӱзгар-ым пӧлеклаш сайжак огыл. А тыште йоча-влак  эртен каят, южо фотом ышта. Кугуеҥ-шамычат  коштыт, пашам ужыт да шогалыт, нунат войзен налыт. Тыге  тыште да моло вере шӱкым шагал ыштат, шкем арун кучат».  Тиде верыште ондак вӱд­уа кушкын шарлен ыле. Нуным кораҥденам да тыгодымак  ик корзиҥга почеш весым пидынам.

Астаховмытын садыштышт альпийский курык уло,  пеледыш-влакым чаткан гына авырен шындыме. Тыгак пакчаште ятыр вере иман кушкыл воктене гипс кӱ -шамыч койыт.

­ – Мый курыкыш, Камский Устьеш канаш коштына.  Тиде кӱ -шамыч вӱдыштӧ кия,но вӱд толкын  нуным серыш лектеш.- каласыш Александр Николаевич. Каласыман,тыште участкым  эн ончыч  налын.

– Пӧртым, беседкым, вӱдым погаш кугу атым ыштенам. Мый дечем вара пошкудо-влак тыгак ушненыт, – ойла пӧръеҥ. –  пачерна гыч сад марте нылле  минут ошкылман. Мыланна  Александр эргына полша.

— Эн ончыч  тыште олмапу шкеак шочын. Тудо моткоч тутло олмам пуа.  — мутланымашкына пелашыже Надежда Леонидовна ушныш.

­ – Ачам, Николай Петрович Астахов, илмыж годым ММЗ-ште цехым вуйлатышылан пашам  ыштен. –  умбакыже ойла оза.­  – Изием годым пидмыжым ужынам,  тудылан полшенамат. Кидпашаже чыла аралалт кодын. Пенсийыш лекмеке, тудо эре  корзиҥгам пидын. Чонжым йӧратыме пашаште луштарен  манын шонем.

Александр Николаевичын мутшо почеш, пошкудо участке оза деч посна кодын, сандене Астаховмыт тудымат  налыныт.

– Туштыжо чодыра гыч кушкылым конден ситаренна, пӧчыж шудат логалын. Ӱмаште  вич литрым погенна. Шем пызлыгичкыжат  лӱмегож дене пырля  «толшо», тудат иланен, – каласышт нуно.

Мутланымашна изи пӧртыштӧ эрта.  Тышечын каяшат ом вашке –  мылам чыла оҥай. Йыраҥжым  «плоский» манме шифер дене авырен сӧрастареныт. Йырым-йыр тӱрлӧ пеледышым шындыме. Чыла вере ару. Виноград, ошалге-ал родиоло, золотой корень, китай лимонник, , пӧчыж, шиловидный флокс, барвинок…– тыште мо гына ок куш.

Вара оза дене капка ончыко лекна. Тушто корно гоч изи вӱд йоген кая. Ончыч серже пеш куштыран лийын. Но оза тышке вишньым, сливотерным, пызлым шынден. Сер тыманмеш моторештын. – эртыше ошкылшо калыклан веле огыл, шканат куанле.  Тыште теве могай поро да пӱртӱсым йӧратыше  Астаховмыт еш ила, кана да пашам ышта.

М.СКОБЕЛЕВ

Авторын фотожо

Опубликовать в Одноклассники

Добавить комментарий