Вольыкым ялыш пуртымеке, ваче гоч котомкаштым сакен, пӱжалтын, ноен, урем мучко ошкылшо кӱтӱчӧ-влакым изиэм годсек чаманен онченам да, кеч изишак кумылыштым нӧлталаш манын, сола мучашыштым тошкалын модаш тӧченам. Тиде койыш нуным куандаренжак огыл, шонем. Кушкын шумеке, варажым тидым шкеак умыленам.
Йолташ-влак, тыланда кӱтӱчӧ лияш логалын мо? Кушто ты пашам шуктенда? Кӱтӱчӧ лийме мо дене шарналт кодын?
Володя МАТВЕЕВ, мурызо, журналист, Самырык-влаклан Олык Ипай лӱмеш Кугыжаныш премийын лауреатше:
– Мыйын изи годсо жапем, кушкын шумек, кеҥеж канышем ушкал да шорык коклаште эртен. Авам фермыште тыршен, а ачам тӱрлӧ пашам шуктен: коклан кӱтӱмат кӱтен. Когыляныштат полышкалаш эреак коштынам. Шке Отымбал ялысынымат, фермынымат, пошкудо Кытынсола ден Кожлалӱвал ялласе кӱтӱ-шамычымат кӱтенам. Но шкевуя эн шукыжо Татарстанысе Погарня (Учангуш) ялыш кӱташ коштынам. Кушкын шумекат шкалан окса лийже да школлан наледаш ача-авалан полыш лийже манын, кеҥеж гоч кок меҥгым Погарняш кӱташ коштам ыле. Мо оҥайже: шоҥгырак-влак рушла огыт мошто да мый денем татарла кутырат ыле. Ала-мом умылтарен да вашештен моштенам, калтак. Тыглайжат, татар телевидений да радио мемнан сайракын кучат ыле. Пошкудо республикыш кӱтӱм кӱташ коштмо дене татар тӱвыра мылам эшеат лишыл лийын. Но тыгодым мый эре шоненам да кызытат шонем: пошкудо калыкна шке тӱвыражым кӱшкӧ нӧлтен, вияҥден мошта гын, меже молан почеш кодшаш улына? Икманаш, пошкудо калык деч сай койышыжым налын, шке илышыштем кызыт кучылтам.
Кӱтӱчӧ лийме жап гыч кугу сусыр кодын ӱмырешлан. Кӱтӱштына пеш осал ушкал лийын, шукыштым ӧрген, садлан тудын деч лӱдыныт. Тудо ятыр еҥым сусыртен да мыят нунын коклаш логалынам. 7-8 ияшрак лийынам. Шарнем, кок кидемге нӧлталын кертын омыл. Эмлымверыште киен омыл, паремынам вашке, очыни. Но, вачем эреак корштен да иктаж вич ий ончыч тергыктенам: лектын кайыше лийын улмаш.
А.БАЙКОВА ямдылен
Фотом еш альбом гыч налме
