Кӱртньымат сылнештараш лиеш…
Марий Турек велне командировко дене лиймына годым апшат, сӱретче Николай Тимофеев деке унала пурашак тыршем. Ты ганат тыгак ыштышым.
Параньга район Олор ялыште илыше Николай Григорьевичым шукертак палем, санденат тудын дене вашлийын мутланаш кумыл эреак уло. Адакшым сад-пакчаштыже мом гына ончен огеш кушто! Шке жапыштыже тудын деч пеледыш нӧшмым, вондым налынам ыле, Йошкар-Оласе садыштем чылажат иланен. Тидын дене теве мом каласынем: Николай Григорьевич кӱртньым тапташ, сӱретлаш гына огыл, тӱрлӧ кушкылым ончен кушташ мастар. Тидылан тудо самырык тукымым уло кумылын туныкта.
– Тиде апшаткудылан негызым 1932 ийыште ыштыме. Умбакыже, Кугу Отечественный сар годым, тудым ӱдырамаш-влак нӧлтеныт, – умылтара апшат. – Илена, да таза лиям гын, 100 ийлан тендам унала ӱжам. Апшатлан 35 ий утла ыштем. Шкемым ремесленниклан ом шотло, кӱртньым сылнын таптыше мастар улам манын шонем. Кӱртньымат сылнештараш лиеш. А шонымашыш шуатат, пуйто шулдыр кушкеш! – ойла Николай Григорьевич.
Ушештарена, шке жапыштыже тудо М.Шкетан лӱмеш Марий национальный драме театрлан Воштончыш залжылан теҥгылым сылнештарен. Тыгак Андрей Эшпайын «Иван Грозный» фильмжылан бутафорий арвер-шамычым ыштен. Кызыт тӱрлӧ флюгельым, брелокым, шпильым ямдыла. Кажне пашаже шкешотан, сылне да мом-гынат ончыктышо. Мутлан, ик ешлан ыштыме сакыш шотышто да моло пашаже шотышто тыге каласыш:
– Молан тыште йӱксӧ? Йытыралыкым, шотан улмым ончыкта. Калыклан от умылтаре гын, ок умыло, шонем…
Волжский районышто кок почан флюгерым ыштенам. Раиф монастырь пеленысе Никольский скитлан тӱньык вуйыш авыртышым ыштем – пеш сылне наста лиеш. Весе. Чоткар патырлан композицийым ямдылем…
Коеш, кидмастар паша деч посна огеш шинче да чылажымат чоным пыштен ышта.
Чеверласыме годым пашаштына пиалым тыланыш. Мутат уке, ме чылан апшаткудо ончылно войзалтна.
Тоштем пытыше халат, шукым ужшо шем кепке, пондаш кокла гыч шыргыжмыже чурийже – чыла тиде ӱмырешлан ушеш сӱретлалт кодеш. кодо.
М.СКОБЕЛЕВ
Авторын фотожо
