Марий Эл вуйлатышын пашажым жаплан шуктышо Юрий Зайцев национальный гвардийын Юл кундемысе войска-влакын командующийже генерал-полковник Александр Порядин дене вашлийын.
Нуно регионышто правопорядкым аралыме йодышым, тыгак РФ вооруженный вийын верховный главнокомандующийже – элын президентше Владимир Путинын шындыме задачыже-влакым кузе шуктымым каҥашеныт.
– Мемнан чыла 14 субъектыштат силовой блок ден кучемын тӱрлӧ органже дене вашкыл сай. Тачысе кечылан Украина кумдыкышто задачым шуктена. Ӱшандарен каласен кертам: Марий Эл гыч ОМОН ден СОБР тушто тидым кӱлеш семын шуктат, – палемден Александр Порядин.
Марий Эл Республикым вуйлатышын организаций да аналитике виктемжын уверже-влак негызеш Л.Камалетдинова ямдылен.
