УВЕР ЙОГЫН

Кӱчык жап, сай йӧн, ӱшанле аралтыш

 

Июль гыч россиян-влак икмыняр бюрократический тат да, манмыла, вӱд йымалысе кӱ деч утлат. Мутлан, инвалидностьым налме але пеҥгыдемдыме процедур простаҥеш, тыгак илыме верыште регистрацийым ышташ куштылгырак лиеш. Тылеч посна парыман еҥ-влаклан счётыштышт илен лекташ кӱлмӧ кугыт оксам арален кодаш йӧным пуат, а кредит ойпидышлаште займын суммыжо раш ончыкталташ тӱҥалеш.

Россиян-влакын илышышкышт пуртымо тиде да моло вашталтыш нерген – темлыме лаштыкыште.

 

Паспортым писынрак ямдылат

Июль тӱҥалтыш гыч гражданинын МВД органыш але МФЦ-ыш документым пуымыж деч вара паспортым вич паша кече деч кужу жап ямдылышаш огытыл. «Корочкым» пуымо жап гражданинын ны илыме верже, ны документым вашталтыме амалже дене кылдалтын огыл.

Паспортым пуымо але вашталтыме нерген йодмашым МВД-ын миграций йодыш дене чыла подразделенийыштыже да МФЦ-ыште налыт.

 

Электрон йодмашым пуаш йӧнанрак

Ик гана тӱлыман пенсий выплатым налаш праван граждан-влак йодмашым Россий але кугыжаныш огыл пенсий фондыш электрон йӧн дене, ты шотыштак Кугыжаныш услуго портал, МФЦ (ведомство-влак коклаште тидын шотышто ойпидышым ыштыме гын) гоч, пуэн кертыт.

 

Поликлиникыш – полис деч посна

Поликлиникыш тарваныме годым пелен обязательный медицине страхований полисым налдеат лиеш. 1 июль гыч тудын олмеш личностьым пеҥгыдемдыше документым ончыктымат сита.

Тиде вашталтыш ОМС системын шушаш реформыжын ужашыже лийын. Тудын кышкарыштыже ончыкыжым кагаз полисым электрон документ дене вашталташ палемдыме.

Тылеч посна, пациент страховой организацийым ойырен налдеат кертеш – тидым илыме верысе ОМС фонд шке ышта.

 

Специальный налог режим

1 июль гыч изи бизнеслан специальный налог режим вийыш пура. Тиде мере амалкалче-влакын илышыштым простаҥдымашке виктаралтын. Вашталтыш изи бизнес ден ИП-ым икымше гана регистрироватлыше-влак дене кылдалтын, да налогообложенийын простаҥдыме автоматизироватлыме у системыж дене лачшымак нунылан пайдаланаш йӧн ышталтын.

 

Парыман, но праван

1 июль гыч «Испольнительный производство нерген» федеральный законыш пуртымо вашталтыш вийым налын. Тудын дене келшышын, парыман еҥ-влак счётыштышт илен лекташ кӱлмӧ кугыт оксам кодымо нерген йодмашым возен да тудым вигак кредит организацийыш намиен пуэн кертыт.

Тиде вашталтыш калыкым неле илыш йыжыҥыште окса деч посна кодмо деч арала.

 

Пенсийым закондымо манипуляций деч аралат

1 июль гыч кугыжаныш огыл страховой пенсий фонд-влак ик компаний гыч весыш закондымын кусарыме оксам россиян-шамычлан пӧртылтышаш улыт. Закон граждан-влакым оксам ик кугыжаныш огыл пенсий фонд гыч весыш вкладчиклан увертарыде кусарыме деч аралымашке виктаралтын.

Тиде случайыште пенсионер-влак кугыжаныш огыл пенсий фондышто погымо оксаштым пӧртылтен веле огыл, тыгак тудым закондымын кучылтмылан процентым налын кертыт.

 

Компенсацийым – Кугыжаныш услуго портал гоч

Медицине велым палемдыме почеш транспорт средство дене пайдаланыше инвалид-влак але нунын закон дене палемдыме еҥышт ОСАГО-н тичмаш акше гыч пел ужашым компенсаций шот дене пӧртылтымӧ нерген йодмашым Кугыжаныш услуго портал гоч пуэн кертыт.

Колышо военнослужащийын да силовой манме орган пашаеҥын ешыштат социальный полыш мере-влакым пуымо нерген йодмашым тиде портал гочак пуэн сеҥат. Мут – илыме верлан ыштыме роскот, капитальный ремонтлан тӱлымӧ взнос, илыме вер да коммунал услуго, тыгак йоча-влаклан пособий нерген.

 

Экскурсовод аттестациян лиеш

1 июль гыч гидлан але экскурсоводлан Россий Федерацийын гражданинже веле пашам ыштен кертеш. Депутат-влакын шонымышт почеш, шочмо элын историйжым сайын палыше квалифицироватлыме специалист-шамыч гына турист-влаклан чын уверым пуэн кертыт. Но тиде йодмаш инструктор-проводник-шамыч дене кылдалтын огыл.

Тылеч посна, экскурсовод, гид-кусарыше да инструктор-проводник-влак вич ийлан ик гана туризм аланыште регионысо органын аттестацийжым эртышаш улыт. Тыгай документым 2023 ий 1 июль марте налаш йӧным ыштыме.

Палемдыме йодмашым пудыртымылан административно мут кучаш шогалтат.

 

Инвалидностьым – у семын

Инвалидностьым пеҥгыдемдыме у правил-влакымат 1 июль гычак илышыш пурташ тӱҥалыт. Тудын дене келшышын, граждан-влак инвалид улмым пеҥгыдемдыше комиссийым очно але заочно эртен кертыт. Тидыжым экспертизылан комиссионный направленийым налме деч вара медико-социальный экспертизым (МСЭ) эрташ келшымашым возымо йыжыҥыште палемдаш кӱлеш.

Очный формо годым гражданин МСЭ-м эртарыме верыште лично лийшаш, але комиссий тудын илыме верышкыже (пӧртышкыжӧ, интернатыш, исправительный тӧнежыш, медицине организацийыш) мийышаш. Заочный экспертизе йодмашым пуышо еҥын документше негызеш эрта. Тудыжым МСЭ-н бюрошкыжо пациентын тазалыкшым эскерыше медицине организаций  колта.

 

Учётыш шогалаш куштылго

1 июль гыч граждан-влак илыме вер шотышто учётыш муниципальный район кумдыкышто регистрацийым ыштыше кеч-могай органыште шогалын кертыт, а Москваште, Санкт-Петербургышто да Севастопольышто – ола кумдыкысо чыла органыште.

Йодмашым электрон формо денат, Кугыжаныш услуго портал гочат колташ лиеш,  регистраций нерген свидетельствымат нине канал гочак налаш йӧн уло.

МФЦ, ТСЖ, кугыжаныш услуго пашаеҥ-влак, тыгак регистраций нерген данный-влакым кусарымылан мутым кучышо моло еҥ уверым регистрационный органыш ик кече жапыште пуышаш улыт.

Законыш пуртымо вашталтыш дене келшышын, миграций шотышто специалист-шамыч айдемым илыме верыштыже куд кече жапыште регистрироватлышаш улыт.

 

Пырчым тергат

Российыште шурнын да тудын негызеш ямдылыме продуктын кугыжаныш мониторингшым пуртат. Специалист-влак пырчым ончен-куштымо верыште поген налме пагытыште шымлат. Ялозанлык сатун лачшымак могай йодмаш дене келшен толмыжым РФ Минсельхозын пеҥгыдемдыме переченьыштыже ончыктымо. Тӱҥ шотышто пырчын видшым, тудын пайдалыкшым, тыгак продуктым ямдылыме верым шотыш налыт.

Эксперт-шамыч тиде мониторингым ялозанлык сатум ямдылен лукшо-влаклан пырче нерген чын уверым пуашлан эртараш тӱҥалыт.

 

Тичмаш суммым ончыктат

3 июль гыч банк-влакын клиентышт кредит продукт нерген утларак тичмаш уверым налаш тӱҥалыт. «Потребительский кредит (займ) нерген» федеральный законыш пуртымо вашталтыш дене келшышын, банк-шамыч кредит ойпидышлаште палемдыме процентын кугытшым запятой деч вара кумшо знак марте да гарантироватлыме эн изи ставкым ончыктышаш улыт. Тиде ойпидышын икымше лаштыкыштыжак ышталтеш.

Тыгодымак Сбер оксам вес банкын картышкыже, кредит да микрофинанс организацийлашке нунын сайтышт да приложенийышт гоч кусарымылан комиссийым пурта. Тудын кугытшо 1,25 процент лиеш: эн шагалже – 30 теҥге, эн шукыжо – 150 теҥге. Сберын клиентше тылзыште 50 тӱжем марте теҥгем «Сбербанк Онлайн» приложений гоч комиссий деч посна кусарен кертеш. Моло банкын клиентыштлан СБП (писын тӱлымӧ системе) гоч колтымо 100 тӱжем теҥге гычат комиссий огеш налалт.

 

Лаштыкым М.ИВАНОВА ямдылен

Опубликовать в Одноклассники

Добавить комментарий