Марий Элын Ветеринарий комитетшын увертарымыж почеш, Йошкар-Олаште ятыр вере колышо кӧгӧрчен-влак лекташ тӱҥалыныт.
Санденак комитетын специалистше-влак верыш лектын, кажне тыгай уверым тергат. Колышо кайыкым погат да тергымашке колтат. Тидын дене пырля кӧгӧрченым мумо верыште дизинфекцийым эртарат.
Ветеринар специалист-влакын палемдымышт почеш, колышо кайык-влакын капыштышт орнитоз черым ылыжтыше бактерийым мумо. Орнитоз, вес семынже попугай чер – тиде пӱсӧ инфекций чер, уло организмым аярта, лихорадкым ылыжта, шодым, рӱдӧ нерв системым локтылеш, мокш ден леплан кугемаш негызым ышта. Чер дене пӧрткайык, лудо, кӱрка, попугай, канарейке, оласе кӧгӧрчен-влак черланен кертыт.
Сандене специалист-влак шижтарат: ир кайык-влакым кид гыч пукшаш огеш кӱл. Кӧгӧрчен шуко улмо верымат кораҥ каяш тыршыман. А кайык коклаш логалында гын, гигиене нормым эскерыман. Пачерыште кучымо декоративный кайыкын клеткыжымат эре эрыктыман.
С.Носова
Авторын фотожо
