Эртыше кугарнян Йошкар-Олаште Пашам муаш полшымо всероссийский ярмиҥган кумшо федерал йыжыҥже эртен.
Тиде кечын Тӱвыра да каныме рӱдӧ парк мӱкш омартала гӱжлен: пашам муаш полшымо «Работа России. Время возможностей» всероссийский ярмиҥга пашам пуышо-влак ден тунемме заведений-шамычын выпускникыштым, пашам кычалше да профессийым вашталташ шонышо шӱдӧ дене еҥым иквереш чумырен.
Мероприятийыште республикысе 50 наре предприятий ден организаций шке вакансийыштым темленыт, паша ойыртем, социальный гарантий да профессийлан тунемаш лийме йӧн-влак дене палдареныт. Мероприятийыш толшо-шамыч калыклан пашам муаш полшымо службын специалистше-влак дене келшыше профессийым ойырен налме да тудлан тунемме нерген шинчаваш мутланен, тыгак мастер-класслашке ушнен кертыныт.
Пашам пуышо-влак коклаште регионын «Марий машиностроитель завод», «Полупроводник прибор завод», «Копир» завод», «Искож» завод», «Йошкар-Оласе шыл комбинат», «Метма» АО-влак гай кӱкшӧ технологиян преприятийже-шамыч лийыныт. Нунылан Марий Элын паша да социальный аралымаш министрже Елена Таникова ярмиҥгашке ушнымыштлан да пашам кычалше ден профессийлан тунемаш шонышо-влак дене вашкылым ыштымыштлан таумутым кучыктен.
Ярмиҥгаште Волгатехын Йошкар-Оласе аграрный колледжшын стендше поснак ойыртемалтын. Студент-влак «Профессионалитет» федерал проектын кышкарыштыже зажиганий свечам тергыме шотышто мастер-классым ончыктеныт да автоэлектрике шотышто презентацийым ыштеныт.
Икманаш, «Работа России» ярмиҥга тиде кечын пашам пуышо ден пашам кычалше-влакын вашлийме площадкышт лийын. Тудо республикысе калыклан пашам муаш, профессийыште вияҥме корным ойырен налаш сай йӧным ыштен.
– «Кадр» национальный проектым илышыш пуртымо ужаш семын эртаралтше тиде ярмиҥгам самырык специалист ден пашам пуышо-влак коклаште пеҥгыде кылым ыштыме, у йӧн-влакым темлыме да вашмутланыме пайдале платформо семын аклем, – мероприятийым иктешлен Елена Таникова (снимкыште).
«Работа России. Время возможностей» всероссийский ярмиҥган федерал йыжыҥыштыже элыштына 85 тӱжем утла еҥ келшыше пашам муын, экономикын тӱрлӧ аланже: промышленность, транспорт, энергетике, услуго, IT, банк сектор да шуко моло – гыч 23 тӱжем наре пашам пуышо 520 тӱжем утла вакансийым темлен.
Маргарита Иванова.
Марий Элын Паша да социальный аралымаш министерствыжын фотожо.
