Марий Элыште сайлымашым эскерыше мер штабын экспертше-влак сайлымашлан пӧлеклалтше «йыргешке ӱстелым» эртареныт. Кандидат-влакым регистрироватлыме паша мучашлалтын, сандене шкешотан иктешлымашым ышташ лиеш.
— Демократийын проблемыжым шымлыше фондын шукерте огыл савыктыме докладыштыже политике партий-влак шке пашаштышт чулымлыкым ончыктат манын палемдыме. Лийшаш сайлымаште Российын 23 партийже шке кандидатурыштым темленыт, регионыштына шушаш сайлымаште 7 партийын кандидат-шамычын лӱмыштым бюллетеньыште ужаш лиеш, — каласен Марий Элыште сайлымашым эскерыше мер штабым вуйлатыше Евгений Кузнецов.
Тенийысе сайлымаш кампаний пытартыш ийлаште ик эн кугу. Тений Марий Элыште 6-8 сентябрьыште верысе самоуправленийыш да регионысо законодательный органлаш сайлаш тӱҥалына. Тиде кампанийыште 1353 кандидат участвоватлаш тӱҥалеш. Поснак Кугыжаныш Погыныш да Йошкар-Ола Депутат-влак погынымашыш кандидат-влак шукын улыт.
– Кугыжаныш Погыныш 52 депутатым сайлат (39 еҥже – одномандатный округышто, 13-шо – партийный списке дене), Йошкар-Оласе погынымашыш – 35 одномандатникым, – каласен Евгений Кузнецов.
– Республикыштына 39 мандантный округ уло. Таче кечылан 205 еҥ кандидатуржым темлен, регистрацийым 201 еҥ эртен, – палемден регионысо Избиркомын еҥже Мария Микка.
«Йыргешке ӱстел» йыр погынышо-шамыч тиде сайлымашын ойыртемже, дистанционный электрон йӱклымаш, нерген мутланеныт. ДЭГ йӧн дене кече мучко пайдаланаш лиеш. А шке пашажым тудо 6 сентябрьыште 8 шагат эрдене тӱҥалеш да 8 сентябрьыште 20 шагат кастене мучашла. 31 июльлан дистанционный формат дене йӱклаш йодмашым 2500 еҥ пуэн, – каласен М.Микка.
Л.ШАБДАРОВА
